Sylvia, nagpapahinga na sa bahay, pero mahina pa; Mga kapamilya, negatibo sa Covid-19  

“BAHAY na. Nagpapahinga at mahina pa. Masaya at buhay kami mag -asawa,” ito ang sabi sa amin ni Sylvia Sanchez kahapon nang kumustahin namin.

 

Hirit namin na, ‘sabi na nga hindi papasa si ‘veerus’ sa inyo. Ramdam ko, gagaling kayo.’

 

“Hindi pumasa pero muntik na,” ito ang sagot ng aktres.

 

Walang matandaan kung saan at paano nagkaroon ng Covid-19 sina Sylvia at asawang si Art Atayde dahil wala namang sakit ang mga kaibigang nakasalamuha nila bago sila nagkaroon ng sensyales.

 

At habang nakikipaglaban kay Covid-19 ang mag-asawa ay naisip ng aktres na ayaw na niya ng may katampuhan o kasamaan ng loob dahil life is short.

 

Aniya, “Tumatanda na ako ayaw ko na katampuhan kaaway. Mabuti na ‘yong bati-bati na. Ito ‘yong isa sa positive na resulta ng Covid sa amin.”

 

Sinang-ayunan namin ito dahil oo nga ang daming realization sa nangyaring ito sa lahat na walang mayaman o mahirap kapag tinamaan ka ng Covid-19 ay sa ospital ang bagsak.

 

Sabi namin na magpahinga na si Ibyang dahil panay pa rin ang social media, “nagpapa-antok lang. Oo, nanghihina pa rin, pero at least Covid-19 negative na.”

 

Nabanggit din namin na nagbiro si Papa Art na plano niyang pumunta ng Wuhan, China.

 

“Oo, pangarap talaga niya ‘yan,” sagot naman ni Ibyang.

 

Hala, seryoso nga talaga si Papa Art?

 

Anyway, mukhang inantok na si Ibyang dahil hindi na sumagot sa chat namin.

 

Samantala, nag-post naman ng resulta na Covid-19 negative ang lahat ng mga kasama sa bahay nina Papa Art at Ibyang na sina Menggay, Cherry, Dalia, Nacel, Mila, at maging ang kapatid ng aktres na si Janice.

FACT SHEET
ni Reggee Bonoan