Pagawaan ng pekeng alcohol bistado, Tsinoy arestado

KALABOSO ang isang Tsinoy na nagmamanupaktura ng pekeng alcohol matapos ireklamo ng kanyang mga kapitbahay at opisyal ng barangay, kahapon ng umaga sa Tondo, Maynila.

Ayon sa ulat ni MPD PIO P/Lt. Col. Carlo Manuel, kinilala ang suspek na si Robert Tiu Teng, may address sa Dayao St., Tondo, Maynila at nadakip rin ang ilang tauhan na hindi pa pinangalanan at kasama sa mga inaresto.

Ayon kay Manila Police District Balut Station (MPD-PS1) commander P/Lt. Col. Christopher Navida, ikinasa ang operasyon dakong 10:30 am.

Naaresto ang suspek matapos ang isinagawang test buy ng mga operatiba sa nasabing lugar.

Kasunod nito, nadiskubre ng mga awtoridad ang isang bodega na sinasabing gawaan ng mga pekeng alcohol.

Magugunitang nagkaubusan ng mga tindang alcohol sa botika at medical stores dahil sa COVID-19.

Iniimbestigahan nina P/Lt. Col. Christopher Navida ang mga suspek upang matukoy kung may iba pang bodega ng pekeng alcohol. (BRIAN BILASANO)