HATAW! D'yaryo ng Bayan hatawtabloid.com
MALAMANG na nagdiriwang ang supporters nina Coco Martin at Julia Montes dahil muling ipinalabas kahapon (Lunes) ang teleseryeng pinagsamahan nila, ang Walang Hanggan noong taong 2012 mula sa Dreamscape Entertainment.
Maraming nagsabing bagay na bagay ang dalawa dahil ang ganda ng chemistry nila kaya nabigyan agad sila ng pelikulang kinunan sa Amsterdam at Paris, ang A Moment in Time, noong 2013.
At dahil halatang kinikilig sa isa’t isa sina Coco at Julia ay hindi na sila tinantanan ng lahat kung ano ang tunay nilang relasyon na pareho naman nilang itinanggi pero aminadong gusto nila ang isa’t isa nang matanong sila sa presscon ng Wansapanataym: Yamishita’s Treasures noong 2015.
Sa hindi malamang dahilan ay hindi na nasundan ang tambalan ng Coco-Juls dahil kung kani-kanino na sila ipinareha na nag-click naman lalo na nang gawin ng aktor ang FPJ’s Ang Probinsyano.
At dahil successful ang FPJAP ay hinihiling din ng karamihan na sana mag-guest si Julia, pero hindi na mangyayari dahil may sariling weekly series na ito, ang 24/7.
Nag-post naman si Julia sa kanyang Instagram account ng ilang litratong pareho silang nakasuot ng puti ni Coco na kuha sa Walang Hanggan teleserye nitong Linggo.
Ang caption ay, “Walang Hanggan bukas na after It’s Showtime.”
FACT SHEET
ni Reggee Bonoan
