HATAW! D'yaryo ng Bayan hatawtabloid.com
NAKALIGTAS sa tiyak na kamatayan ang aktres na si Kim Chiu makaraang paulanan ng bala ng riding-in-tandem ang kanyang sasakyan habang papunta sa taping, kahapon ng umaga sa Quezon City.
Sa ulat kay Quezon City Police District (QCPD) District, P/BGen. Ronnie Montejo, ng Criminal Investigation and Detection Unit (CIDU) dakong 6:15 am, nang maganap ang pananambang sa sasakyan ni Chiu sa harap ng UP Town Center sa kanto ng Katipunan Ave., at CP Garcia Ave., Barangay UP Campus, QC.
Sakay ang aktres ng kanyang kulay itim (bullet proof) Hyundai H350 (GAF 6474) na minamaneho ng kanyang driver na si Wilfredo Taperla, kasama ang personal assistant ng artista.
Ayon kay Taperla, papunta sila sa taping nang sandaling huminto ang kanilang sasakyan sa kanto ng Katipunan Ave., at CP Garcia Ave., dahil pula ang ilaw ng traffic light sa lugar.
Makaraan, pinagbabaril ng isa sa lalaking sakay sa motorsiklo ang sasakyan ng aktres bago tumakas patungong Katipunan Avenue.
Dahil bullet proof ang sasakyan, hindi tumagos ang bala sa salamin kaya nakaligtas ang aktres maging ang dalawang kasama niya.
“‘Di namin napansin na may putukan sa likod. Dito pala sa amin pinatama. Kami pala ang pinaputukan,” pahayag ni Taperla.
Samantala, sa Instagram ng aktres, kanyang sinabi na wala siyang alam na nakaaway at naniniwalang biktima lamang siya ng ‘mistaken identity.’
“I don’t have an idea (of) what really happened. Mistaken identity, I guess? Napagtripan? This is a bad joke,” pahayag ng 29-anyos aktres.
“Paano kung itinuloy kong magbasa ng script? I was so scared, I don’t know what to feel right now,” isinulat pa ng aktres sa kanyang Instagram.
“Wala naman akong kaaway or kaatraso. Kung sino man ang gumawa nito, Diyos na ang bahala sa inyong dalawa,” dagdag ni Chiu.
Kaugnay nito, bumuo ang QCPD ng Task Force Kim para matutukan ang kaso.
Ayon kay Montejo, kinuhaan ng imbestigador ng salaysay ang aktres maging ang dalawang kasama niya habang kumakalap ng mga saksi sa pinangyarihan ng insidente na posibleng makakikilala sa mga suspek.
Nakipag-ugnayan na rin ang QCPD sa MMDA at iba pang establisiyemento sa lugar na may CCTV na posibleng nakunan ang pangyayari upang gamiting ebidensiya at makatutulong sa ikalulutas ng insidente.
Hindi pa kombinsido si Montejo sa naging pahayag ni Chiu sa social media na posibleng pananakot ang intensiyon ng mga suspek dahil kapag may namaril ay malinaw na may intensiyon na pumatay.
Ani Montejo, bago ihayag ng pulisya na isang mistaken identity ang insidente, magsasagawa muna sila ng masusing imbestigasyon.
ni ALMAR DANGUILAN
