HATAW! D'yaryo ng Bayan hatawtabloid.com
NAMATAY ang isang ginang nang umakyat sa matarik na overpass sa Barangay San Bartolome, Quezon City, nitong Miyerkoles ng tanghali.
Sa inisyal na report sa Criminal Investigation and Detection Unit ng Quezon City Police District (CIDU-QCPD), dakong 12:00 ng tanghali, kahapon, nang matagpuan ang bangkay ng hindi pa kilalang ginang na tinatayang nasa edad 50-55 anyos, may taas na 4’9, nakasuot ng black and white stripe long sleeves at printed leggings sa overpass sa Quirino Highway malapit sa San Bartolome Elementary School, Barangay San Bartolome.
Nagbabantay sa barangay outpost ang tanod na si Apolinario Llaguna nang may nag-report sa kaniya na may isang babae ang tila naghihingalo sa overpass.
Agad ipinagbigay alam ng tanod sa pulisya ang insidente ngunit pagdating sa lugar ay wala nang buhay ang ginang. Walang nakitang sugat o pinsala sa katawan ng ginang kaya hinihinalang nahapo sa pag-akyat sa overpass, nahilo o inatake at saka tuluyang natumba.
(A. DANGUILAN)
