HATAW! D'yaryo ng Bayan hatawtabloid.com
BINALAAN ni Department of the Interior and Local Government (DILG) Secretary Eduardo Año ang mga ‘bulok’ na pulis na sangkot sa korupsiyon at talamak na bentahan ng ilegal na droga na kanyang sisipain sa loob ng Philippine National Police (PNP).
Ayon kay Año, titiyakin niyang matatanggal mula sa PNP ang mga ‘bugok na itlog’ dahil sila ang nakasisira sa imahen ng pulisya.
“I will make sure the scalawags in the PNP organization are weed out. We will continue to do until the last scalawag is out. It is very important to get the trust and confidence of the public and we can only do so if we get rid of rotten eggs,” ani Año, kasunod ng deklarasyon ni Pangulong Rodrigo Duterte na nais niyang malinis muna ang PNP bago magtalaga ng bagong pinuno nito.
“The PNP is really doing good in its campaign against illegal drugs and criminality. Unfortunately may kaunting sumisira ng imahen at ito ang tatanggalin natin,” pagtitiyak ni Año.
Una nang inatasan ng pangulo si Año na pangasiwaan ang PNP habang mananatili muna si P/Lt. Gen. Archie Gamboa bilang officer-in-charge ng PNP.
Kompiyansa ang pangulo na matutulungan siya ni Año sa paglilinis sa puwersa ng pulisya.
Direktiba ng Pangulo kay Año, tanggalin sa puwesto ang mga pulis na sangkot at may rekord nang pagkakasangkot sa ilegal na droga, ngunit dapat dumaan ito sa due process.
Nauna nang sinabi ni Año na nais niyang sa recruitment pa lamang ay simulan na ang paglilinis sa hanay ng pulisya.
Ipinag-utos niyang tiyakin ang mga “the best at brightest applicants” na may puso sa paglilingkod ang pupuno sa 17,000 vacancies sa PNP. (ALMAR DANGUILAN)
