HATAW! D'yaryo ng Bayan hatawtabloid.com
“SINO ang pumatay sa tatay ko?”
Ito ang naiiyak na tanong ng batang si Princess Arianne Caniban, 10 anyos, sa isang programang inilunsad ng mga anak ng biktima ng Ampatuan Massacre noong 23 Nobyembre 2009 kamakailan.
Bukas, 23 Nobyembre 2019, eksaktong 10 taon o isang dekada nang naghihintay at umaasam ng hustisya ang mga pamilya ng mga biktimang umabot sa 58 katao kabilang dito ang 32 mamamahayag.
Hindi lamang ang pamilya ng mga biktima ang naghihintay. Nakaabang ang sambayanang Filipino sa ibababang hatol ng hukuman sa Quezon City sa 20 Disyembre 2019.
Isa lang ang tanong, sa mahabang panahon ng paghihintay nina Princess Arianne (noo’y sanggol pa lamang at ngayon ay 10-anyos na) at iba pang mga anak ng mga biktima. Makakamit kaya nila ang katarungan?!
Sa mga organisasyong nagsulong at tumulong sa kasong ito, alam nating mayroong totoo at hindi iniwan ang mga pamilya ng mga biktima.
Pero, mayroon ding ginamit sila sa propaganda, lalo na tuwing sasapit ang eleksiyon. Mayroon ding mga nagpasiklab… at ang nakalulungkot baka may kumita pa.
Parang sa rami ng mga nagsabing tumutulong sila at isinusulong ang laban dahil sila umano’y mga ‘crusader’ (pwe) at ‘freedom fighter’ kuno, ‘e iilan lang ang nakita nating seryosong umagapay sa pamilya ng mga biktima, mula umpisa hanggang sa kasalukuyan. Hindi ‘yung bigla na lang nagsasalita at nag-iingay kapag dumarating ang ‘petsa ng pamamaslang.’
Hindi pa natin nalilimutan, noong panahon na pangulo ang inyong lingkod ng National Press Club (NPC) ay dumalo pa tayo sa pagdinig doon sa Bicutan.
Isa rin tayo sa naghain ng petisyon na magkaroon ng live coverage na napagkasunduang maglalabas ng malaking monitor para makita ang kaganapan sa pagdinig.
Pero mayroong isang abogadong umapela kaya imbes magkaroon ng live coverage ay ipinagbawal na lang ng korte.
History na lang ngayon si Mr. Lawyer.
Pero ang isang organisasyon, gaya ng National Union of Journalists of the Philippines (NUJP), isa sa mga organisasyong hindi iniwan ang mga biktima ng Ampatuan massacre ay maglulunsad mamaya, 7:00 pm 22 Nobyembre ng #fightfor58 A Concert for Justice sa Mow’s Bar, Matalino St., Quezon City.
Ang kikitain sa nasabing konsiyerto ay mapupunta sa mga kaanak ng mga biktima.
Bukas 5:00 am. 23 Nobyembre, bilang paggunita sa ika-10 anibersaryo ay magkakaroon ng Kapihan para sa Hustisya at ang Journalists’ Community Mural Painting for Press Freedom sa Mehan Garden, Ermita, Maynila.
Suportahan po natin ang mga aktibidad na ito para sa mga kaanak at pamilya ng mga biktima.
Umaasa tayo na katarungan ang hatid na kalatas sa 20 Disyembre 2019.
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
