Obrero patay sa bugbog ng katrabaho

PATAY ang isang 42-anyos construction worker makaraang  bugbugin ng katrabaho mata­pos ang mainitang pagtatalo habang nag-iinuman sa Malabon City, kamakalawa ng gabi.

Dead on arrival sa Ospital ng Malabon (OsMa) ang biktimang kinilalang si Danny Tumulag, tubong Purok Tubod, San Jose, Dipolog City, sanhi ng grabeng bugbog mula sa mga kasamahang kapwa stay-in.

Kinilala ni Malabon police chief P/Col. Jessie Tamayao ang mga suspek na sina Jericho Baisa, 18 anyos, tubong Meycauayan, Bulacan, at Norwen Magboo, 19 anyos, tubong Rosario, Batangas, kapwa naaresto ng mga nagrespondeng pulis sa follow-up operation.

Sa pahayag ng saksing si Danjin Almodovar, 16 anyos,  sa mga  imbestigador na sina P/Cpl. Joenel Claro, at P/Cpl. Michael Oben, dakong 6:25 pm nang maganap ang pambubugbog sa biktima sa loob ng pinagtatrabahuan sa  #7 Allan St. Gabriel Subd., Brgy. Hulong Duhat.

Nauna rito, masayang nag-iinuman ang biktima at ang mga suspek nang biglang magkaroon ng mainitang pagtatalo sina Tumulag at Baisa.

Para makaiwas sa sakitan, nagtungo ang biktima sa kanyang barracks ngunit sinundan ni Baisa at sinapak sa panga dahilan upang bumagsak sa semento si Tumulag.

Tinangkang awatin ng saksi ang suspek ngunit  pinigilan siya ni Magboo habang patuloy na ginugulpi ni Baisa ang biktima at pagkatapos ay mabilis na nagsitakas.

Agad isinugod si Tumulag sa naturang paamutan. (ROMMEL SALES)