HATAW! D'yaryo ng Bayan hatawtabloid.com
ISA tayo sa mga natutuwa sa hakbang na ito ni Mayor Francisco “Isko Moreno” Domagoso — ang mahigpit na pagbabawal sa pagbebenta ng GSM.
GSM as in “galing sa magnanakaw” na cellphones.
Lalo na nang mabisto niyang mukhang ang mga bumibili ng nakaw sa Aranque ay napunta na riyan sa Isetann Recto.
Hindi pa natin nalilimutan ang mga insidente ng mga kabataang estudyante na hinoldap o inagawan ng cellphone pero mahigpit na tumutol kaya nagbuwis ng buhay sa kamay ng mga magnanakaw.
Sana nga ay tuluyan nang ‘mawalis’ ang mga bumibili ng GSM. Kaya nagkakalakas ng loob ang mga magnanakaw na ‘yan kasi nga mayroong bumibili ng mga ninakaw nila at ibinebenta na kunwari ay second hand.
Pero sa totoo lang Yorme, hindi lang naman cellphone ang GSM.
Nariyan pa rin ang mga motorsiklong ninakaw, alahas na sinikwat, DSLR na camera, mga piyesa ng sasakyan, at kahit carnap na kotse.
Mas malalaking items ‘yan. Kulangot lang diyan ang mga cellphone na GSM na anytime ay puwede pang ipa-block ng may-ari.
‘Yun pong mga binabanggit natin na mas malalaking magnanakaw, kadalasan ay protektado ng mga awtoridad.
May mga kaso nga na ‘yung nakaw na motorsiklo sa estasyon pa ng pulisya natagpuan.
Kaya siguro dapat, hindi lang GSM na cellphone ang target.
Lahat ng items na GSM (galing sa magnanakaw) dapat nang ipagbawal at sudsurin kung sino ang mga utak sa likod niyan.
Maliit na tip lang po ‘yan, Yorme. Kapag sinudsod n’yo ‘yan mas marami pa kayong mabubuking.
‘Yun lang po!
ELEVATORS
SA MAKATI CITY HALL
DRAWING LANG?!
SA kabuuan ay mayroon tayong nakikitang pitong yunit ng elevator sa Makati City hall.
Pero lagi tayong nagtataka kung bakit laging mahaba ang pila sa elevator area.
E kasi naman po, sa pitong yunit ng elevator, tatlo lang pala ang gumagana.
Mantakin naman ninyo, mayroong project na underground subway pero ‘yung pitong elevator hindi mapagana nang sabay-sabay?!
Pero siyempre, hindi naman lahat nahihirapan sa elevator ng Makati City. Mayroong isang yunit para lamang sa pribelihiyado — gaya ng mga hepe ng bawat departamento, gaya ng BPLO at iba pa.
Puwede naman isingit ang mga senior citizens at PWDs, pero ganoon pa rin, maghihintay nang matagal kasi nga tatlong yunit lang ang gumaganag elevator.
Mayor Abby Binay, Madam, iniuulat kaya sa inyong tanggapan na tatlong yunit lang ang gumaganang elevator diyan sa Makati City Hall?!
Aba’y baka hindi pa ninyo alam ‘yan, pakibusisi na nga.
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa JERRYAP888@YAHOO.COM. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
