HATAW! D'yaryo ng Bayan hatawtabloid.com
PATAY ang isang driver/mekaniko nang harangin ang dala-dala niyang Montero SUV at pagbabarilin ng riding-in-tandem sa Quezon City, nitong Martes ng umaga.
Sa ulat na nakarating kay QCPD Director, P/Col. Ronnie Montejo, ang biktima ay kinilalang si John Carl Tulabot Basa, 21 anyos, may live-in partner, tubong Marilao Bulacan, kasalukuyang naninirahan sa Blk 27 Lot 48, Northville 2, Bignay, Valenzuela City.
Sa imbestigasyon ng Laloma Police Station, dakong 8:30 am kahapon, 8 Oktubre, nang maganap ang pamamaril sa kanto ng Sgt. Rivera Ave., at Ragang St., Brgy Manresa, QC..
Ayon sa saksing si Julius Labastida Kho, 21, hinarang ng riding-in-tandem ang kulay pulang Montero Sport, may plakang NNO 252, at pinaulanan ng bala ng baril sa nasabing lugar.
Nang makitang duguang nakabulagta ang target, agad tumakas ang mga suspek na naka-facemask at half face helmet sakay ng getaway motorcycle na hindi naplakahan.
Naisugod pa sa Chinese General Hospital ang biktima ngunit makalipas ang ilang oras ay binawian din ng buhay dahil sa maraming tama ng bala ng hindi pa batid na kalibre ng baril sa katawan, ayon kay Dr. Vic Maceda.
Patuloy ang isinagawang pagsisiysat ng pulisya sa pangyayari upang malaman ang tunay na motibo. Inaalam din ng pulisya kung pinagkamalan lang ang mekaniko. (ALMAR DANGUILAN)
