HATAW! D'yaryo ng Bayan hatawtabloid.com
HINDI nakaligtas sa kamatayan ang lolang street sweeper nang siya ay ‘walisin’ ng rumaragasang wagon sa Brgy. Payatas, Quezon City, nitong Lunes ng madaling araw.
Kinilala ni P/MSgt. Edgardo Talacay, deputy ng Traffic Sector 5 ng Quezon City Police District (QCPD) ang biktimang si Marilyn Flora Pareño, 60 anyos, residente ng Sorsogon St., Group 6, Area B, Brgy. Payatas, QC.
Sumuko sa pulisya si Charmaine Balosoto Ybañez, 25 anyos, dalaga, call center agent, naninirahan sa Blk. 5 Lot 18, Phase 3A Eastwood Greenview Subd., Brgy San Isidro, Rodriguez, Rizal, at nagmamaneho ng Ford Everest Wagon, may plakang TSI-825.
Sa imbestigasyon ni P/SSgt. Leonardo Policarpio, dakong 5:30 am, nitong 7 Oktubre nang maganap ang insidente sa Payatas Road, QC.
Mula sa Litex Road, binabaybay ni Ybañez ang Payatas Road patungo sa Montalban, ngunit bago sumapit sa Leyte St., nahagip si Pareño na noon ay abala sa pagwawalis sa kalsada sa kanto ng Samar St., Brgy. Payatas.
Naisugod sa General Malvar Hospital ang biktima pero idineklarang dead-on-arrival dahil sa pagkabali ng tuhod at grabeng pinsala sa ulo at katawan. (ALMAR DANGUILAN)
