Nagpasabog sa seafood resto huli sa checkpoint (Malapit sa Malacañang)

ISANG rider na tinang­kang lusutan ang inilatag na police checkpoint ang dinakip matapos mahu­lihan ng droga at granada sa Quezon City.

Natuklasan, ang rider na nahuli sa checkpoint ay siyang nagpasabog ng granada sa isang seafood restaurant malapit sa Malacañang, nitong 14 Setyembre.

Iniharap sa media nina NCRPO Chief P/Maj. Gen. Guillermo Elea­zar at  Acting Quezon City Police District (QCPD) Director, P/Col. Ronnie Montejo, ang suspek na si Luis Castillo Cariño, 38, construction worker, at  nakatira sa Brgy. 164 Tondo, Maynila.

Sa ulat ni Fairview Police Station (PS 5) chief, P/Lt. Col. Carlito Man­tala, dakong 11:40 am kahapon, 25 Setyembre nang sitahin si Cariño sa checkpoint sa Mindanao Extension corner Rega­lado Avenue, Brgy. Greater Lagro dahil walang suot na helmet habang sakay ng kanyang motorsiklo.

Imbes bumaba sa kanyang Yamaha 110 Crypton motorcycle (BO9515),  pinaharurot ni Carño ang kanyang motorsiklo.

Agad hinabol ng mga pulis ang suspek hang­gang makorner ng blocking force at nang kapkapan ay nakuhaan ng tatlong sachet ng droga sa kanyang bulsa.

Nang siyasatin ang dala niyang bag, bumu­ngad sa mga pulis ang isang hand granade.

Sa interogasyon, uma­min ang suspek na siya ang responsable sa pagpapasabog ng gra­nada sa C-Foods Resto sa 5th Street corner Con­cepcion Aguila St., Brgy. 638, San Miguel, Maynila, malapit sa Malacañang nitong 14 Setyembre 2019.

Nakakulong ngayon ang suspek sa QCPD detention cell at naha­harap sa kasong illegal possession of explosives at possession of Illegal Drugs.

Ayon kay Eleazar, hindi ito maituturing na terorismo pero patuloy pa rin niyang pinaiim­bestigahan ang suspek.

“Natutuwa tayo dahil sa sipag ng ating mga tauhan na magsa­gawa ng checkpoints ay nahuli ang suspek. Asahan po ng ating mga kababayan na mas paiigtingin natin ang ating anti-criminality ope­rations lalo na’t papalapit ang holiday season,” dagdag ng QCPD chief. (ALMAR DANGUILAN)