Pharmacist, nurse, arestado sex, party drugs kompiskado

NASAKOTE ng mga operatiba ng Philip­pine Drug Enforcement Agency (PDEA) ang isang lisen­siyadong pharmacist at registered nurse sa  magkasunod na anti-illegal drug operation sa Pasig City  at Quezon City, iniulat kahapon.

Kinilala ni PDEA Director General Aaron Aquino, ang dalawang suspek na sina Juan Carlos Reyes, licensed pharmacist, at Nilo Mani­pon, isang  registered nurse, residente sa Pasig at Quezon City.

Unang nadakip si Reyes, dakong 2:30 am kahapon, 19 Setyembre, sa Room 2212 Pribato Hotel, Pasig City.

Nakompiska kay Reyes, ang isang capsule ng ‘fly high’ na nagka­kahalaga ng P2,500; 6 sachet ng marijuana kush na may timbang na 6 gramo at nagkakahalaga ng P12,000; isang gramo ng marijuana seeds na may halagang P3,000;  20 tableta ng ecstacy na nag­kakahalaga ng P42,000; liquid ecstacy na ang halaga ay P426,000; one Security Bank check  booklet, buy bust money at mga drug para­pher­nalia na may kabuuang halaga na P483,500.

Sumunod na nadakip si Manipon, bandang 4:20 am sa  Kamuning Road, Brgy. Kamuning, QC.

Nasamsam sa kaniya ang 15 gramo ng shabu na nagkakahalaga ng P102,000;  12 capsule ng fly high na nagka­ka­ha­laga ng P30,000;  5 tableta ng ecstacy na may katum­bas na  halagang P10,000; isang  kotseng Honda BR-V at  drug paraphernalia.

Umaabot sa higit P.6 milyon ang kabuuang  mapanganib na droga ang nasamsam sa dalawang suspek.

Ang mga nadakip ay nakapiit ngayon sa PDEA Headquarters sa NIA Road, Brgy. Pinyahan, QC, habang inihahanda ang kasong paglabag sa RA 9165 o Compre­hensive Dangerous Drug Act of 2002.

ni ALMAR DANGUILAN