JVA ng AFP at DITO telco iimbestigahan ng Senado

NANINIWALA si Sena­dora Risa Hontiveros na malalagay sa alanganin ang national security ng bansa matapos ang kasunduan sa pagitan ng AFP at ng DITO Telecomunity Corp., na pinapayagan ng AFP na magtayo ng equipment at pasilidad sa loob ng military bases ng bansa.

Dahil dito naghain ng Senate Resolution 137 si Hontiveros na nagla­layong imbestigahan ang naturang kasunduan matapos aminin ni DND Secretary Delfin Loren­zana na wala siyang alam sa naturang kasunduan.

Lumalabas, ang DITO Telecommunity Corp ay dating kontrober­siyal na Mislatel Con­sortium.

Ang naturang kasun­duan sa pagitan ng AFP at DITO Telecommunity Corp na pag-aari ng kaibi­gan ni Pangulong Rodrigo Duterte na si Dennis Uy at ng China State Run Telecom ay labis na pinangangambahan ni Hontiveros.

Ayon kay Hontiveros, sa panahon na patuloy ang panghihimasok ng China sa West Philippine Sea, napaka-iresponsable aniya na pumasok ang gobyerno sa mga kasun­duan sa China na hindi sinusuri ang epekto nito sa pambansang seguri­dad at kaligtasan.

Iginiit ng senadora, ang naturang kasunduan ng AFP at DITO Tele­comunity Corp sa pagpa­payag na magtayo ng mga pasilidad at equip­ment sa loob ng military bases sa bansa ay mali­naw na paglabag sa Section 88 ng Public Land Act na mahigpit na ipinagbabawal sa batas na paupahan o ibenta ang bahagi ng military bases ng bansa nang hindi dumadaan sa kongreso.

(CYNTHIA MARTIN)