HATAW! D'yaryo ng Bayan hatawtabloid.com
BISYO na ‘to!
‘Yan ang reklamo ng mga motorista na dumaraan diyan sa Arnaiz at Evangelista streets sa Makati City laban sa traffic enforcers na nakatalaga riyan sa area na ‘yan.
Alam po ba ninyo kung bakit?!
Aba, imbes magmando ng trapiko para hindi nagkakamali ang mga motorista lalo na ‘yung mga hindi kabisado ang mga kalye sa Makati, ang ginagawa ng traffic enforcers sa nasabing area, hinahayaan silang magkamali.
At kapag nagkamali, hayan na, lalabas na ang mga ‘kamote’ saka kakawayan ang nagkamaling motorista.
Siyempre magkakaroon ng paliwanagan at negosasyon hanggang mauwi sa… ahem… alam n’yo na.
Saan naman kayo nakakita na every 20 minutes ay may huli ang nasabing traffic enforcers kung hindi ba naman talagang sinasadyang manalakab ng mga motorista?!
Hindi po ito kailan lang o bago lang. Matagal na itong ‘bisyo’ ng traffic enforcers na ‘yan sa Makati.
Mukhang ang gusto ng traffic enforcers diyan sa Arnaiz at Evangelista streets ‘e bantayan pa sila ni NCRPO chief, P/MGen. Guillermo Eleazar bago magtino.
Pakisampolan na nga po, Sir!
BAKIT NAMAMAYAGPAG
ANG ‘CHINESE LOAN SHARKS’
SA PH CASINOS?
TANONG po ‘yan ng marami lalo’t nagiging talamak ang kidnapan ng mga magkakababayan na Chinese nationals.
Ang unang rason, masyadong maluwag ang mga batas o regulasyon kaugnay ng pagsusugal sa mga casino sa ating bansa.
Kaya ang nangyayari, rito na nagsusugal ang mga Chinese national at dito rin nangungutang ng pangsugal nila sa mga kababayan nilang ‘loan shark.’
Kapag natalo sila at nabaon sa utang, isa lang ang solusyon, kunin sila at ikulong sa mga hotel at saka doon makikipagnegosasyon sa mga kamag-anak nila sa China na tubusin ang kapamilya nila.
Kasi nga sa China, hindi puwede ang one-to-sawang paglalaro sa casino lalo’t ordinaryong mamamayan lang sila.
Kapag naobserbahan na sobra-sobra ang kuwartang ipinangsusugal, tiyak iimbestigahan na sila ng kanilang gobyerno.
Dito sa ating bansang Filipinas, hindi ganoon ang buhay nila. Puwede silang magsugal nang magsugal nang magsugal. ‘Yun lang kapag natalo sila, mga loan shark ang magkukulong sa kanila.
Pero hindi lang dapat ito pinanonood ng mga awtoridad sa ating bansa. Dapat imbestigahan nang malalim ang raket na ito ng tila namumuong mafia ng Chinese loan sharks dahil darating ang panahon na makaaapekto ito sa industriya ng turismo at maging sa ekonomiya ng bansa.
Huwag po nating sabihin na hayaan natin ‘yang mga ‘yan, magkakababayan naman.
Panahon na para mgakaroon ng mahigpit na regulasyon ang gambling agency ng bansa lalo’t nagiging talamak ang kidnapan.
Aksiyon po ang kailangan.
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa JERRYAP888@YAHOO.COM. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
