HATAW! D'yaryo ng Bayan hatawtabloid.com
KULONG ang isang grade 6 pupil sa halagang P142 mula sa hinoldap niyang Angel’s Burger sa Barangay Greater Fairview sa Quezon City, nitong Lunes ng umaga.
Sa ulat ni P/MSgt. Roderick Mallanao ng QCPD Fairview Police Station 5, ang insidente ay naganap dakong 4:20 am kahapon, 12 Agosto, sa Angel’s Burger branch sa Commonwealth Ave., Brgy. Greater Fairview, Quezon City.
Ang biktima ay kilalang si Ma. Sharimae Casten Pastor, 22 anyos, dalaga, college graduate, residente sa Unit 2341 4th Floor, Floravista Condominium, Peacock St., Brgy. Greater Fairview, at crew ng Angel’s Burger.
Agad naaresto ang suspek na si Kenneth Catadman Bersalona, 21, binata, Grade 6, merchandiser, at naninirahan sa Block 56 Lot 5 Sitio SAMAPA, Brgy. Greater Fairview, ng nasabing lungsod.
Batay sa pahayag ng nakasaksing si John Bagares Galvinder, 37, binata, bus inspector ng Block 1 Lot 4 Divina Gracia Zone 2, Graceville, CSJDM, Bulacan, bumibili siya ng burger nang pumasok ang suspek, sinakal ang biktima saka pinadapa at nagpahayag ng holdap.
Pagkatapos ay saka nilimas ng suspek ang mga barya na nagkakahalaga ng P142 na nakalagay sa tray at isinilid sa dala nitong Samsonite shoulder bag.
Hindi pa nakontento ang suspek at binalikan ang crew at tinanong kung saan nakalagay ang kanyang mga benta pero mabilis na nakatakbo ang biktima at humingi ng saklolo.
Agad nadakip ang holdaper ng mga tauhan ng Fairview Police na sina P/Cpl. Rodmar Don Brusas, P/SSgt. Cyrel Aguitong, sa tulong ng mga barangay police na sina Geraldo Dela Cruz at Joselito Villona ng nasabing barangay. (ALMAR DANGUILAN)
