Security officer ng city hall, itiumba ng riding-in-tandem

PATAY ang isang empleyado ng Malabon City Hall makaraang pag­babarilin ng hindi kilalang riding-in-tandem sa naturang lungsod, nitong Lunes ng gabi.

Dead on arrival sa Ospital ng Malabon (OsMa) ang biktimang kinilalang si Angelo Aquino, 33 anyos, secu­rity officer ng Malabon City Amphitheater at residente sa Sioson St., Brgy. Dampalit, sanhi ng mga tama ng bala sa katawan ng hindi nabatid na bala ng baril.

Pinaghahanap ang dalawang hindi kilalang suspek sakay ng hindi naplakahang motorsiklo patungo sa Brgy. Hulong Duhat ng lungsod.

Batay sa ulat ni P/Lt. Rolando Domingo, da­kong 10:30 pm nang maganap ang pana­nambang kay Aquino sa Gen. Luna St., Brgy. Dampalit.

Pauwi umano ang biktima sakay ng kan­yang bisikleta at malapit na sa kanyang bahay sa nasabing lugar nang sabayan ng isang motor­siklo na agad siyang pinagbabaril.

Anang imbestigador na si P/SSgt. Ernie Baroy, tinitingnan nila ang tat­long motibo na kina­bibilangan pagkakaroon ng romantic angle at personal na away ni Aquino.

Nabatid na kamakai­lan ay may nahuli ang biktimang tatlong kasa­mahan sa trabaho na nagnakaw ng tatlong timba ng pintura para sa renovation ng Amphi­theater na agad niyang isinumbong.

Isa rin dito ang pag­susuplado niya sa ilan niyang mga kababayan sa Malabon na hindi nito pinayagang makaigib ng tubig sa loob ng nasabing teatro na ikinagalit sa biktima.

Nagkaaway din umano ang biktima at asawa nito dahil sa isang babaing nabuntis na nauwi sa pagpapa­kama­tay ng anak nila nang mabuking.

Patuloy ang isina­sagawang imbestigasyon  ng  pulisya upang maba­tid kung sino ang mga suspek.

ni ROMMEL SALES