HATAW! D'yaryo ng Bayan hatawtabloid.com
DALAWANG big time drug traders ang naaresto ng pulisya na nakompiskahan nang mahigit sa P.6 milyong halaga ng shabu sa ikinasang buy bust operation sa Malabon City kahapon ng madaling araw.
Kinilala ng hepe ng Malabon police na si P/Col. Jessie Tamayao ang mga suspek na sina Marlon Solano, alyas Bombay, 32 anyos, residente s Block 54, Lot 21, Phase 3F2 Dagat-Dagatan, at Matthew Von Erick Soriano, 24 anyos, taga-Brgy. 12, kapwa ng Caloocan City.
Ayon kay Tamayo, ilang linggong nagsagawa ng surveillance ang kanyang mga tauhan laban sa mga suspek.
Dakong 3:00 am kahapon, kaagad na nagkasa ng buy-bust operation ang mga tauhan sa Station Drug Enforcement (SDEU) sa pamumuno ni P/Lt. Zoilo Arquillo laban sa mga suspek sa panulukan ng Teachers Village at Pla-Pla streets, Brgy. Longos, Malabon City.
Isang pulis ang nagpanggap na bibili ng shabu, na nagkakahalaga ng P1,000 at nang maiabot na ang droga ay dito kaagad inaresto.
Nakompiska mula sa mga suspek ang nasa 23 pirasong plastic sachet, na naglalaman ng shabu, na tinatayang nasa mahigit 100 gramo, na nagkakahalaga ng P680,000.
Itinuturing na big time na tulak ng ilegal na droga sa nabanggit na lugar ang mga suspek na nakatakdang sampahan ng kasong paglabag sa Republic Act 9165 o Comprehensive Dangerous Drug Act of 2002.
(ROMMEL SALES)
