PNoy, Binay idinawit din sa droga noong 2014 at 2015

INAMIN ni Senate Pre­sident Vicente Tito Sotto III na idinawit noong taon 2014 at 2015 sina dating Pangulong Benigno Noy­noy Aquino III at dating Vice President Jejomar Binay sa illegal drugs ng taong kahalintulad ng nagbubulgar ngayon.

Sinabi ni Sotto, na­pag-alaman sa kanyang staff na may lumapit sa kanyang tanggapan noon na idinadawit ang dating pangulo at pangalawang pangulo sa illegal drugs.

Ayon kay Sotto, inim­bestigahan ito ng kanyang tanggapan ngunit hindi nagtugma ang mga bank account na sinasabing account ng pangulo at bise presidente kaya’t hindi nila pinag-aksaya­han ng oras dahil walang sapat na batayan para patulan ng senado.

Sa ngayon, may luma­la­bas na namang isyu na idinadawit ang Pangu­long Rodrigo Duterte at si dating SAP Bong Go.

Handa ang tangga­pan ni Sotto na imbesti­gahan ito bago imbestiga­han ng senado upang maiwasang magamit ang mataas na kapulungan sa mga maling imporma­syon.

Sa naturang presscon hindi maiwasang magka­sa­gutan sina Senador Bam Aquino at Bong Go sa isyu ng black propa­gan­da at nagturuan na kapwa kampo ng kalaban ang nagpapasimula nito.

Sa huli, naawat ni Sotto at nagkasundo ang dalawa na dapat iwasan ng oposisyon at ng admi­nistrasyon ang black propaganda.

Naghubad ng pang-itaas si Bong Go para patunayan na wala si­yang tattoo sa kanyang likuran tulad ng aku­sasyon ni Bikoy at luma­pit pa kay Senador Bam Aquino. 

(CYNTHIA MARTIN)