5 bagets arestado sa droga

LIMANG bagets kabi­lang ang isang menor de edad ang arestado maka­raang makuhaan ng mga pulis ng ilegal na droga sa magkahiwalay na lugar sa Caloocan City.

Ayon kay Caloocan Police Community Pre­cinct (PCP) 2 commander P/Maj. Merben Bryan Lago, dakong 11:00 pm nang respondehan ng kanyang mga tauhan ang isang insidente sa kaha­baan ng 2ndAve., Brgy. 41.

Pagdating sa lugar, naabutan ng mga pulis si John Carlo Alcoriza, Jerico Alpe, at Danvel Modesto, pawang 18 anyos, na nag-aamok kaya inaresto nila.

Nang kapkapan, nakuha sa mga suspek ang dalawang plastic sachet na naglalaman ng hinihinalang pinatuyong dahon ng marijuana.

Dakong 1:30 am, nagpapatulya ang mga tauhan ng PCP-7 na sina P/Cpl. Siador at Pat. Mendoza sa kahabaan ng Tullahan Road, Brgy. 162 nang makita ang dala­wang lalaki na nagtutulak ng motorsiklo na kinila­lang si Miko Flagne, 18 anyos at isang 17-anyos binatilyo.

Sinita ng mga pulis ang dalawa saka hinana­pan ng driver’s license at dokumento ng motorsiklo ngunit walang naipakita at nang kapkapan naku­ha sa mga suspek ang dalawang plastic sachet ng hinihinalang shabu.

(ROMMEL SALES)