Arestadong hired killers pinagbabaril sa Maynila

PATAY ang dalawang nadakip na hired killer nang tambangan ng motor­cycle riding-in-tandem gunmen habang lulan ng mobile patrol pagkagaling sa inquest proceedings pabalik sa police station sa Sampa­loc, Maynila.

Naganap ang pana­nambang dakong 4:15 pm, sa kahabaan ng A.H. Lacson Avenue ilang metro mula sa panulukan ng Fajardo St., sa Sampaloc, nang biglang sumulpot ang tatlong riding-in-tandem saka hinarang ang MPD mobile car MC 328.

Sa inisyal na ulat ng pulisya, binabaybay ng mobile car ang naturang lugar nang mapahinto dahil humarang ang riding-in-tandem.

Kasunod nito, biglang bumaba ang sakay ng nasa unahan na motor­siklo at lumapit sa mobile car kasabay ng dalawa pang riding-in-tandem saka tinutukan at dini­s­armahan ang dalawang pulis na sina Po1 Joven Miguel at Po2 Mark de Lima.

Pinadapa ng apat na armadong suspek ang dalawang pulis saka wa­lang habas na pinapu­tu­kan ang mobile na ikina­matay ng dalawang lalaki na nauna nang nahuli ng pulisya.

Kinilala ang mga na­paslang na sina Apolonio Flores ng Fajardo St., Sampaloc, at Prince Cortez, 22 anyos, nego­syante at residente sa Malaya St., Balut, Tondo na sinasabing hired killer/gun for hire na nahuli sa magkasunod na police operations sa Sampaloc at Tondo, Maynila kamaka­lawa ng hapon.

Nakompiska kina Flores at Cortez ang isang loaded kalibre .45, gran­da, at mga cellphone na naglalaman ng mga impormasyon kaugnay sa kalakaran ng droga sa Tondo.

Galing sa inquest proceedings ang police mobile lulan ang dala­wang naarestong gun-for-hire nang tambangan ng mga suspek.

Patuloy ang imbes­tiga­syon ng pulisya sa insidente.

(BRIAN BILASANO)