HATAW! D'yaryo ng Bayan hatawtabloid.com
ISA tayo sa mga pabor at natuwa sa ginawa ng Department of Transportation (DOTr) na paglalagay ng Heroes’ lounge para sa mga active at retired soldiers and policemen at sa kanilang immediate family sa 24 airports sa bansa kabilang na ang Ninoy Aquino International Airport (NAIA).
Sana sa mga susunod na panahon, hindi lamang sa mga airport kundi maging sa mga pier at bus stations dahil hindi naman lahat ng sundalo o pulis ay kayang sumakay ng eroplano.
Alam po ba ninyo sa Estados Unidos, napakataas ng paggalang na iginagawad ng mga mamamayang Amerikano sa kanilang mga sundalo.
Mayroon silang military lounge sa bawat airport at doon ay inaasikaso silang mabuti maging sa pagkain.
Kahit saang tindahan, shop, groceries at department store ay mayroong nakalaang discount para sa kanila — ID lang nila ang katapat.
Lalo na sa kanilang commissary, talagang napakamura ng bilihin, para silang nasa Duty Free.
Lahat ng taong makasalubong nila ay binabati sila at nagpapakita at nagpaparamdam ng mataas na pagpupugay.
Kahit hindi opisyal, kahit pangkaraniwang sundalo ay mataas ang paggalang ng mga mamamayan sa Estados Unidos.
Alam kasi nila na itataya ng mga sundalong Amerikano ang kanilang buhay alang-alang sa kanilang bayan at mamamayan.
Dito sa ating bansa, sana ay maging legacy ng Duterte administration ang batas na magbibigay nang mataas na pagpapahalaga sa ating mga sundalo.
Ang problema kasi kapag hindi isinabatas ‘yan, after Duterte administration ay manganganib na tanggalin sa NAIA ang military and police lounge.
Pero kung magiging batas ‘yan, ibig sabihin mapaglalaanan talaga ng budget sa Appropriations Act at hindi basta mababalewala.
Panahon na siguro para maimulat natin sa ating mga kabataan na ang ating mga sundalo at pulis ay hindi kaaway kundi tagapagtanggol ng mamamayan.
At sana ay ganoon din ang maipatimo sa isip ng bawat sundalo at pulis — dapat na sila ay kakampi ng bayan — at hindi mapanakot, mapang-api at nagiging ‘goons’ ng mga gahaman.
For this one, kudos Secretary Art Tugade!
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa JERRYAP888@YAHOO.COM. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
