Sindikatong gumagamit sa mga bata patawan ng parusang mabigat

NANANAWAGAN si Senador Joel Villanueva sa pamahalaan at mga mambabatas na bigatan ang parusa sa mga guma­gamit sa mga kabataan para gumawa ng isang krimen.

Ito ang isa sa nakiki­tang solusyon ni Villa­nueva sa dumaraming bilang ng mga kabataan na nasasangkot sa krimen.

Ayon sa  Senador, imbes ibaba ang criminal liability sa 9 anyos tulad nang naipasa ng house mas makabubuti na bigatan ang parusa sa mga gumagamit sa mga bata sa mga ilegal na operasyon o pagpasok sa krimen.

Naniniwala si Villa­nue­va na ang mga inosen­teng kabataan ay biktima rin ng matatandang nag­tuturo nang mali kapalit ng pananakot o malaking halaga.

Kasabay nito, nana­na­wagan si Villanueva sa gobyerno na palakasin ang intelligence unit at gawin ang lahat ng kapa­sidad para mapababa ang krimen imbes parusahan ang mga kabataan.

Binigyang-diin ng senador, dapat rin i-improve ang mga reha­bilitasyon para sa mga kabataan na naliligaw ng landas.

Dagdag ni Villanue­va, ang pagdami ng bilang na nasasangkot ang mga kabataan sa kriminalidad ay pagpa­patunay na bigo ang pamahalaan na bigyan ng proteksiyon ang mga kabataan kung kaya’t mali aniya ang pananaw ng ilan na parusahan ang mga batang wala pang kamalay-malay na nasa­sabit sa krimen. (CM)