HATAW! D'yaryo ng Bayan hatawtabloid.com
MAY bagong pahirap na naman pala ang Land Transportation Office (LTO) para sa bayang motorista na nagre-renew ng kanilang lisensiya sa pagsisismula ng taon.
Ang bagong patakaran: tanging medical certificates na ipinasa sa online mula sa accredited na klinika at doktor ang kanilang tatanggapin.
Ganoon din daw sa mga driver na nag-a-apply para sa student permit.
Nagsimula raw ang bagong policy nitong Lunes sa
National Capital Region (NCR) at sa Region 11.
Siyempre naglabas ang LTO-NCR ng listahan ng accredited clinics and doctors sa kanilang Facebook page.
Ang bagong patakaran daw ay ipatutupad na rin sa Regions 5, 4A, 4B, 7 simula sa Lunes, 14 Enero 2019. At magkakaroon naman ng bisa sa 21 Enero sa Regions 6 and 9; at sa Regions 1, 2, 3 sa 28 Enero; sa Regions 10, 8, Cordillera Administrative Region at CARAGA sa 4 Pebrero.
Ayon kay LTO Region 1 Director Teofilo Guadiz ginawa nila ito para hindi sila masalisihan ng pekeng medical certificates.
Ang siste, imbes mapabilis, lalong tumagal ang proseso dahil kakaunti lang ang accredited clinics and doctors ng LTO.
Kaya hindi na lang sa LTO mahaba ang pila ngayon, pati sa medical clinic na accredited ng LTO ay grabe na rin ang haba ng pila.
Ay sus!
Hindi pa nga nareresolba ni Pong Pagong ‘este LTO chief, Edgar Galvante ang pag-iisyu ng mga plaka sa mga bagong sasakyan. Halos dalawang taon na ‘yung bagong sasakyan hanggang ngayon wala pa rin plaka, tapos ganyan din ang gagawin sa proseso ng pagre-renew ng lisensiya?!
Wattafak!
Puwede ba, resolbahin muna ninyo ang backlog ninyo sa mga plaka ng sasakyan bago kayo umisip ng bagong kahangalan!
LTO chief Galvante, talaga hindi kayo makapag-isip ng ‘gimik’ na magpapabilis ng serbisyo ninyo?!
Aba, pinasusuweldo kayo ng gobyerno hindi para pahirapan ang sambayanan!
Mag-isip naman kayo nang tama!
Ay sus!
IRESPETO ANG TRASLACION BASURA AY PULUTIN
Ilang dekada nang praktis ng mga Filipino ang paglahok sa Pahalik at Traslacion ng Itim na Poong Nazareno.
Malaking bilang ng mga deboto ang naniniwala na ang pagpapakasakit tuwing Kapistahan ng Itim na Nazareno ay nagbibigay ng basbas para gumaang ang buhay ng bawat isa.
Maraming may karamdaman ang naniniwalang pinagaling sila ng Poong Nazareno, kaya walang humpay ang pagdagsa ng mga deboto tuwing 9 Enero mula sa iba’t ibang lugar sa bansa.
Sa ibang lugar naman lalo sa mga lalawigan, gumawa na rin sila ng sariling Traslacion kaysa lumuwas pa sa Maynila.
Nakatutuwa ang ipinakikitang mataimtim na debosyon ng mga Filipino sa Itim na Poong Nazareno. Maging ang inyong lingkod ay naniniwala sa pagbabasbas na ipinagkakaloob ng Poong Nazareno.
Isa lang sana ang hiling natin sa mga deboto, maging disiplinado. Masanay sana ang mga debotong Katoliko na magligpit ng sariling kalat nang sa gayon ay hindi sila nag-iiwan nang truck-truck na basura sa painagdarausan ng Pahalik at dinaraanan ng Traslacion.
Kung magagawa ito ngayong 2019, aba mas maraming bibilib na ang mga deboto ng Itim na Poong Nazareno ay mahusay at mga disiplinado.
Sabi nga, ang pagiging Kristiyano ay makikita kung paano siya namumuhay at hindi lamang sa salita at pagsunod sa tradisyon.
Isang mataimtim na pagdiriwang ng Kapistahan ng Itim na Poong Nazareno sa inyong lahat!
Nawa’y sabay-sabay tayong pagpalain ng Dakilang Nazareno.
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
