Laborer kulong sa shabu

BAGSAK sa kulungan ang isang construction worker na nasa drug watchlist ng pulisya matapos makuhaan ng 13 plastic sachet ng shabu sa Navotas City, kamakalawa ng gabi.

Kinilala ni Station Drug Enforcement Unit (SDEU) head C/Insp. Ilustre Mendoza ang naarestong suspek na si Donnie Mendoza, 39 anyos residente sa Brgy. Tangos.

Sa imbestigasyon ni PO2 Jaypee Mañalac,  dakong 7:00 ng gabi, nagsasagawa ng regular patrol and monitoring sina PO1 Raymund Nagal at PO1 Laurence Candidato sa kahabaan ng A. Cruz St., nang mapansin ang suspek na abala sa pagbusisi sa isang leather coin purse na naglalaman ng mga transparent plastic sachet.

Nilapitan ng mga pulis ang suspek at sinita kung kaya’t nakita sa kanya 13 transparent plastic sachet na naglalaman ng hindi pa matukoy na halaga ng hinihinalang shabu.

Kasong paglabag sa RA 9165 (illegal possession of dangerous drugs) ang isinampang kaso ng pulisya kontra sa suspek sa Navotas City Prosecutors Office.