HATAW! D'yaryo ng Bayan hatawtabloid.com
BUKOD sa magandang relasyon ngayon ng mga pinuno ng ating bansa at ng China, oportunidad para makapagtrabaho sa Filipinas ang tinitingnang bentaha ng ilang Chinese nationals kaya naman sandamakak na sila ngayon sa Perlas ng Silangan.
Ayon sa ilang impomante, ang legal na Chinese workers ay gumagastos nang halos P50,000 para maging legal na manggagawa sa bansa.
‘Yan gastos na ‘yan ay inaabonohan ng agency at pagdating sa Filipinas ay kinakaltas sa kanilang suweldo.
Dahil sa ganyang kalakaran, maraming Chinese ang minabuting pumasok bilang turista sa ating bansa at saka mag-o-overstay at papasok sa mga online gaming.
Korek, karamihan sa mga trabahong napapasukan nila ay mga online gaming. Hindi natin alam kung bakit karamihan sa kanila ay ‘henyo’ sa skills na ‘yan.
Mukhang sanay na sanay sila sa mechanics ng iba’t ibang uri ng ‘laro o sugal’ kaya ‘yan ang hinahanap nilang hanapbuhay na nagkataong marami rito sa Filipinas.
Pero mukhang hirap umano ang Department of Labor (DOLE) para isulong ag kanilang ‘crackdown’ laban sa illegal aliens na umaagaw sa oportunidad ng mga Pinoy na puwedeng magtrabaho sa mga legal na online gaming establishments.
Pero sabi nga, kapag gusto may paraan, kapag ayaw, maraming dahilan.
Hindi ba puwedeng makipag-ugnayan ang DOLE sa Bureau of Immigration (BI) para mainspeksiyon nila ang maraming online gaming dito sa Metro Manila?!
Sabi nga mga taga-BI, “Mission Order” lang ang katapat niyan.
Puwede naman umanong inspeksiyonin ‘yang mga online gaming na ‘yan at hilingin na ipakita ng mga empelyadong alien ang kanilang work permit.
Palagay naman natin ay makikipagtulungan ang mga online gaming establishments kapag nagpakilala ang mga awtoridad.
Hindi dapat matakot ang mga dayuhan kung legal naman ang kanilang mga papeles.
Umaasa tayo na magiging seryoso si Secretary Bello sa pagpapatupad ng crackdown laban mga illegal aliens.
Raise the roof, Secretary Bello!
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa JERRYAP888@YAHOO.COM. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
