HATAW! D'yaryo ng Bayan hatawtabloid.com
MULING kinilala ang husay sa pag-arte ng multi-awarded actor na si Allen Dizon nang tanghalin siyang Best Actor sa katatapos na 66th edition ng FAMAS.
Nasungkit ni Allen ang award para sa mahusay niyang pagganap sa pelikulang Bomba ni Direk Ralston Jover, na gumanap si Allen bilang deaf-mute kaya walang dialogue at kailangang mag-rely siya sa facial expression, hand movements at sa kanyang mga mata para magpakita ng tamang emosyon na kailangan sa eksena.
Isa ito sa pinakamahirap na role na ginampanan ni Allen, na kinailangan pa niyang mag-aral ng sign language sa St. Benilde-School for the Deaf. Pero dahil natural ang galing ni Allen bilang aktor, plus ang kanyang dedikasyon, paghahanda niya rito sa kanyang role, at sa paggabay sa kanya ni Direk Ralston, nagawa niya nang convincing ang hinihinging papel bilang si Pipo.
Dahil sa mga matitinding dagok sa buhay at kawalan ng pag-asa, humantong siya sa sukdulan ng limitasyon bilang indibidwal at animo bombang sumabog.
Ito na ang ika-apat na FAMAS Best Actor trophy ni Allen. Una ay sa pelikulang Paupahan ni direk Joven Tan. Tapos ay sa Dukot ni direk Joel Lamangan at sa Magkakabaung ni direk Jason Paul Laxamana.
Base sa FB post ng proud manager niyang si Dennis Evangelista, nabanggit na isa na lang ay maihahanay na si Allen sa mga naunang naging FAMAS hall of famer na sina Fernando Poe Jr. Joseph Estrada, Eddie Garcia, Nora Aunor, Vilma Santos at Charito Solis na pawang Famas Hall of Famer awardee.
Nauna rito, nanalo rin si Allen sa pelikulang Bomba sa A-List 33rd Warsaw Film Festival, 16th Dhaka International Film Festival, 4th Sinag Maynila Independent Film Festival, at 16th Gawad Tanglaw.
Sa taong ito, ang FAMAS jury ay binubuo ng mga prestihiyosong mga taga-showbiz industry. Kabilang dito sina: chairman ng jury na si Ricky Lee, Direk Eric Matti, Oggs Cruz, Roy Iglesias, Mac Alejandre, Patrick Campos, Eduardo Dayao, Emil Hofileña at Ms. Jaclyn Jose.
Anyway, kabilang sa aabangang pelikula kay Allen ang Maguindanao with Judy Ann Santos at ang The Right To Kill na kapwa mula kay Direk Brillante Mendoza. Ginagawa rin ni Allen ang mga pelikulang Persons of Interest with Liza Lorena and Dimples Romana at Latay with Lovi Poe na parehong pinamamahalaaan ng award winning writer-director na si Ralston.
At sa tindi ng tandem nina Allen at Direk Ralston, hindi ako magtataka kung muling hahakot ng acting award dito si Allen at pati na ang naturang mga pelikula.
ALAM MO NA!
ni Nonie Nicasio
