Pagbabago ni JM, pinagdududahan

HINDI pa man nagsisimula iyong Araw Gabi, sinisiraan na ng iba si JM de Guzman. Sinasabi nila na duda sila kung talagang maayos na ang pagkaka-rehab sa kanya. May mga nagsasabi ring kahit na anong rehab, bumabalik naman talaga ang bisyo sa droga. May mas malupit pang nagsasabi na baka raw ang kalabasan ng seryeng iyan ay kagaya niyong huli niyang ginawa na nagkaroon lang ng problema at hindi na niya natapos.

Kung kami naman ang tatanungin, iyon bang mga artistang kagaya ni JM, na isang mahusay na actor talaga, at sabihin na ngang sa kabila ng lahat ay tanggap pa rin naman ng publiko, ay haharangin ba natin sa kanyang pagbabalik? At bakit sasabihing iyong mga taong nagkaroon ng bisyo sa droga ay hindi na maaaring magbago.

“Bakit ba naman ako na-rehab at nagbago,” sabi ng isang movie writer.

Totoo iyon. May mga taong nagkakamali ng diskarte sa kanilang buhay, hindi lang minsan kundi dalawa o tatlong ulit pa, pero ibig bang sabihin niyon ay dapat na silang husgahan at hindi na bigyan ng panibagong pagkakataon? In the first place, si JM iyong nagkaroon man ng problema, wala namang sinagasaang iba kundi sarili lang niya. Hindi naman siya kagaya ng iba na nagwawala, nambabastos ng kapwa, at nananakit. Kung ganoon ang sitwasyon lalo na’t hindi naman talaga magaling umarte, huwag nang pabalikin iyan.

Pero iyong mga may talent na kagaya ni JM, manghihinayang ka kung mawawala, Kaya dapat lang na bigyan siya ng pagkakataon. Mukha namang natuto na siya ng kanyang leksiyon sa buhay. Mukha namang totoo ang sinasabi niyang this time ay talagang magpapakatino na siya.