Raptors abante ng 2-0 sa EC playoff

TINAPATAN ni DeMar DeRozan ang kanyang career playoff-high na 37 points upang akayin ang Toronto Raptors sa 130-119 panalo laban sa Washington Wi­zards kahapon sa Game 2 ng 2017-18 National Basketball Association, (NBA) best-of-seven playoff.

Bumakas si Jonas Valanciunas ng 19 puntos at 14 rebounds para sa Raptors na itinarak ang 2-0 playoff series sa kauna-unahan sa franchise history, nagtala rin si Kyle Lowry ng 13 markers at career playoff-high 12 assists.

Tumikada ang Toronto ng team playoff record 16 3-pointers noong Sabado, nakapagtala lang sila ng 12 of 32 sa long range sa Game 2, isa lang ang nasalpak sa second half.

Namuno sa opensa para sa Wi­zards si John Wall na may 29 puntos, 20 ang kinana ni Mike Scott habang may 14 puntos  si Ty Lawson.

Dadayo ang Raptors sa Washington sa Sabado para sa Game 3.

Tumapos si Wizards guard Bradley Beal ng nine points.

Naghahabol ng 10 sa pagbubukas ng fourth quarter 90-100, tinap­yasan ito ng Wizards sa lima, 103-108 may 7:52 minuto na lang ang nalalabing oras.

Pero napigilan ang pag-arangkada ng Washington matapos isalpak ni Raptors guard CJ Miles ang long 3.

Kailangan ng Wizards na manalo sa susunod nilang laban upang manatili silang buhay sa inaasam na pagsampa sa susunod na phase.

(ARABELA PRINCESS DAWA)