Pia, natural umarte

MASASABI nga bang isang baguhan talaga si Pia Wurtzbach para tawaging isang new movie actress? Pinag-uusapan iyan noong humarap siya sa media bilang leading lady ni Gerald Anderson para sa pelikulang My Perfect You. Actually iyon ang kauna-unahang pelikula niya na siya ang bida. Noong araw pa lumalabas sa mga pelikula at sa telebisyon si Pia, ibang pangalan pa ang gamit niya noon. Nito lang namang manalo siyang Miss Universe at saka niya ginamit na talaga ang kanyang tunay na pangalan.

May dalawang opinion diyan. Una, iyong nagsasabing hindi mo naman masasabing baguhan pa iyang si Pia dahil beterano na siya ng ilang pelikula at TV shows. Ang ikalawa naman ay sinasabing siguro ok lang naman iyon dahil ngayon lang naman siya nagsisimula ulit ng kanyang career bilang si Pia Wurtzbach. Bago ang pangalan, bago rin naman ang image matapos na manalo sa Miss Universe, kaya masasabing bago rin.

Pero ang mas mahalaga sigurong tingnan natin ay iyong kakayahan ni Pia bilang isang aktres. Sa totoo lang hindi pa namin napapanood si Pia, at siguro kung nakita man namin ang ibang pelikula o TV show na nagawa niya noon, hindi naman namin siya napansin.

Mas napansin namin iyong acting niya noong mapanood namin ang trailer niyang My Perfect You, na nakita lang namin sa internet. Alam naman ninyo, iba pa rin iyong mapapanood mo ang isang performance sa big screen, sa isang sinehan, kaysa napapanood mo lamang sa maliit na monitor. Pero sa nakita naman namin, mukhang nakakakumbinsi ang kanyang acting. Mukhang natural naman ang dating.

Sabihin na nga natin, kasi naman nasa director iyan. Hindi naman nakikita ng artista ang sarili niya habang siya ang umaarte. Iyong director niya ang nakakakita talaga at dapat magsabi sa kanya kung kulang o sobra ang acting niya. Lahat iyan naico-correct naman ng director, maliban na lang kung tamad din ang director at pinababayaan na lang ang lahat matapos lang ang pelikula niya.

HATAWAN!
ni Ed de Leon