P3-M pekeng OTC meds kompiskado

KINOMPISKA ng mga tauhan ng Food and Drug Administration (FDA) ang kahon-kahong pekeng over- the-counter (OTC) medicines sa isinawagang follow-up operation sa isang bahay na ginawang bodega sa Sampaloc, Maynila, kamakalawa.

Ayon kay FDA Director General Nela Charade Puno R.Ph., mahigpit ang kanyang tagubilin sa kanyang mga tauhan sa pangunguna ni FDA Regulations Enforcement Unit (REU) Officer-In-Charge ret. General Allen Bantolo, na maging mahigpit sa pagbabantay at pag-huli sa mga produktong gaya ng mga gamot na hindi rehistrado lalo ang mga peke o counterfeit medicines dahil hindi ito dumaan sa masusing pagsusuri at may masamang epekto sa kalusugan ng mga consumer.

Dahil dito, sunod-sunod ang isinagawang operasyon ng mga tauhan ng FDA-REU sa pamumuno ni Bantolo, nagresulta sa pagka-kakompiska sa tinatayang P3 milyong halaga ng mga pekeng Ibuprofen, Medicol, Ponstan, Diatabs at iba pang vitamin supplements, sa isang bahay sa Unit 206 Sampaloc, Maynila.

Ang pagsalakay ay bunsod nang pagkakahuli sa isang suspek na si Roberto Magalon, tricycle driver, at residente sa Balic-balic, Sampaloc, Maynila.

Lulan si Magalon ng isang itim na Toyota Fortuner, na nagsilbing drug courier ng sindikato ng mga pekeng OTC meds, nang arestohin  sa  ikinasang  entrapment operation sa Hermosa St., Tondo, Maynila.  (BRIAN GEM BILASANO)