Drug pusher tigbak sa parak

PATAY  ang isang hinihinalang drug pusher makaraan makipagbarilan sa mga pulis sa buy-bust operation sa Caloocan City, kamakalawa ng gabi.

Kinilala ni Caloocan police chief, S/Supt. Chito Bersaluna ang napatay na si Niño Maruso, residente sa Libis Talisay, Brgy. 12, ng nasabing lungsod.

Ayon kay Bersaluna, dakong 11:50 pm, nagsagawa ng buy-bust operation ang mga operatiba ng Drug Enforcement Team ng Police Community Precinct (PCP)-2, sa pa-ngunguna ni Insp. Alfredo Remetio, sa bahay ng suspek. Agad natunugan ng suspek na mga pulis ang kanyang ka-transaksiyon kaya’t pinaputukan ang mga awtoridad ngunit walang tinamaan.

Napilitang gumanti ng putok sina PO1 Cris Albert Pirmejo at PO1 Ronnel Yambao hanggang tamaan si Maruso na nagresulta sa kanyang kamatayan.

Narekober ng pulisya sa suspek ang isang kalibre .38 revolver,  tatlong plastic sachet ng shabu, isang plastic sachet ng marijuana at drug paraphernalia.

(ROMMEL SALES)