Turismo ng bansa apektado na naman

ISANG napakalaking dagok sa turismo ng buong bansa ang dinudulot ng kaguluhan sa Marawi City dala ng Maute group kasabay pa nito ang deklarasyon ng Martial Law sa Mindanao.

Ang Department of Foreign Affairs na mismo ang naglabas ng advisory para sa mga turistang nagbabalak magbakasyon at mamasyal sa bansa partikular na sa Timog Kanlurang Mindanao at Sulu Archipelago.

Isang pangunahing dahilan ng travel advisory ang malaking banta ng terorismo hindi lang sa Mindanao kundi sa buong bansa dahil sa mga posibleng pag-atake ng mga terorista gaya ng Maute group na hanggang sa kasalukuyan ay naghahasik pa rin ng lagim sa lungsod ng Marawi.

Ipinag-aalala ng DFA ang posibilidad na ibaling ng mga terorista sa mga banyaga ang paghahasik ng kaguluhan at maaring maging biktima sila ng kidnapping at patayan.

Bukod dito, ipinangangambang maari rin silang maipit sa labanan ng mga sundalong Filipino at mga miyembro ng Maute group.

Ilan sa mga bansang naglabas ng travel advisories ang Estados Unidos, Canada, United Kingdom, at Australia na iwasan ang katimugang  bahagi ng bansa dahil sa banta ng terorismo.

Ayon sa travel advisories ng mga naturang bansa, lubos na pinag-iingat ang mga turistang papuntang Filipinas dahil sa kaguluhan sa Marawi City.

Nakababahala rin kung aabot ang kaguluhan sa Kamaynilaan at maging target ang mga Central Business Districts (CBD’s) gaya ng Makati at Bonifacio Global City (BGC) na tiyak na makaapekto nang malaki sa pambansang ekonomiya.

Hanggang sa kasalukuyan, hindi natin tiyak ang takbo ng utak ng mga teroristang nasa likod ng pag-atake sa Marawi City kung ang paghahasik nila ng kaguluhan ay maaring umabot pa hanggang sa Kamaynilaan.

Lubusang pag-iingat at pagiging alerto ang natatanging sandata ng mga simpleng mamamayan saan mang panig ng bansa upang maging ligtas mula sa terorismo.

Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap