Huwag ninyong bulokin ang Kalibo Int’l Airport! (Attention: CAAP)

WALA bang balak ang pamunuan ng Civil and Aviation Authority of the Philippines (CAAP) na i-overhaul ang “aesthetics” ng Kalibo International Airport?

Minsan akong napadaan diyan ay talagang sobrang nakahihiya ang appearance ng nasabing airport kung ikokompara sa hitsura ng ibang international airports sa bansa!

Bukod sa nakaririmarim na kaanyuan, talagang nakahihiya na ang hitsura ng airport na ito considering na libo-libo ang dumaraang pasahero at turista rito araw-araw!

Sonabagan!

Pagpasok mo pa lang sa arrival and departure ng international, tatambad agad ang mga bulok na airline counters at nanggigitatang salamin ng buong airport!

Pakengshet!

Hindi lang ‘yan!

Pati immigration counters ay halos bagsak na ang kinalalagyan ng keyboards ng computers maging ang kabuuan ng counters ay kupas na ang pintura bukod pa sa halos inaanay na!

Sus ginoo!

Ano na lang ang sasabihin ng mga dumaraang turista riyan?

Ito ba ang sinasabing “beauty” of the Philippines?!

Por dios y por santo!

Pati tiles ng buong international airports ay pawang nakaangat na dahil sa kalumaan at hindi lang miminsan na may mga turistang napasubasob sa pagkakadapa dala ng mga bukol-bukol na flooring nito.

Buti na lang daw at hindi naiisipan ng mga naaaksidente na magdemanda sa nangyari sa kanila?!

And the most humiliating experience na mararanasan sa airport na ito ay ‘yung air-condition units na hindi naman lamig ang inilalabas kundi tagos sa balat na init ng singaw nito!

Wattahek!

Buti na lang at hindi apoy ang binubuga ng mga aircon na ‘yan!

Ang tanong, wala bang nakalaang pondo ang CAAP para sa pagpapaayos ng airport?

Bilyon ang budget ng CAAP na kinukupit ‘este ginagamit sa renovation ng mga airport natin ‘di ba?

Aware kaya si Kalibo CAAP area manager EFREN NAGRAMA sa mga problemang ito ng area of responsibilities (AOR) niya?

Hindi ba niya nakikita ito? Bulag ba siya!?

Balita kasi na mas “at home” sa Iloilo International Airport si GM Nagrama dahil na rin sa pagiging bago nito?!

Alam din natin na mas ‘di hamak na maraming gimikan sa Iloilo kompara riyan sa Kalibo!

Ito kayang si CAAP director general Capt. JIM ‘papogi’ SYDIONGCO, ay pareho rin ni GM Nagarama na may diperensiya sa mata?

Mag-iisang taon na kayong nakaupo riyan mga bossing, sayang naman ang pagkaka-appoint ni President Duterte sa inyo kung pakaang-kaang lang kayo ‘di ba?

Sana naman ay maisipan ng pamahalaan na i-overhaul ang kabuuan ng Kalibo International Airport bago pa tayo mapulaan ng mga dayuhan galing sa ibang bansa.

Isama na rin nila ang kasalukuyang CAAP manager doon!!!

HELLO PET LOVERS
CAREFUL, CAREFUL WHEN
YOU ARE IN THE MALL
OR OTHER PUBLIC PLACES

Panawagan lang po ito sa mga kababayan nating pet lovers, gaya rin ng inyong lingkod, upang kapwa natin maiwasan nag prehuwisyo.

Kung hindi natin maiiwasan na isama ang ating mga alaga (ako po ay may anim na pet dogs) ‘e tiyakin lang natin na hindi sila makasasakit at ganoon din naman na hindi sila masasaktan ng ibang tao.

Gaya na lang ng nangyari kay dating Manila International Airport Authority (MIAA) general manager Ed Manda na nakagat ng isang pet dog sa Wooden Spoon sa Rockwell, Makati City.

Ang ipinagtataka ni ex-GM Manda, kahit may paalala na “no pet allowed”e nakapasok ang isang pet dog sa nasabing restaurant na kung hindi tayo nagkakamali ay pag-aari ni Culinary expert Sandy Daza.

Habang naglalakad papunta sa kanilang mesa, biglang naramdaman ni ex-GM Manda na tila may kung anong tumusok sa itaas ng kanyang bukong-bukong. At nang kanyang i-check ‘e, nakagat na pala siya ng aso.

Aray!

Nang kausapin niya ang may-alaga sa nasabing aso, ayaw magpakilala at tila ayaw panindigan ang kanyang pananagutan bilang pet owner.

Mismong ang management umano ng nasabing restaurant ay nagulat nang malaman na mayroong nakapasok na pet dog sa kanilang restaurant.

Wattafak!

Sa madaling sabi, kaysa makipagtalo sa pet owner na ayaw magpakilala, nagpunta na sa pinakamalapit na Animal Bite Center (ABC) si ex-GM Manda para magpa-ineksiyon ng anti-rabies.

Mabuti na ‘yung sigurado.

Kinailangan din makipag-ugnayan pa si ex-GM Manda sa security management ng Rockwell para makuha ang pangalan ng lady pet owner.

Marami namang paraan para maiwasan ang mga ganitong insidente.

Sa outdoor and indoor private and public places, be sure na hindi mangangagat o hindi mabibigla kapag nakakita ng maraming tao ang inyong pet dog.

Sa mga mall, gaya ng Fairview Terraces, mayroon silang pet dog care center na puwede ninyong pag-iwanan ng inyong mga alaga, habang namamasyal kayo sa loob ng mall, nanonood ng sine o kumakain. Kapag iniwan ninyo ang inyong pet dog sa kanila, pakakainin na sila roon, paiinumin ng tubig at puwede pang makipaglaro sa iba pang pet dogs for P50 per hour.

Sana, lahat ng mall or park ay mayroong ganitong services.

‘Yung iba namang pet owners nilalagyan ng ‘busal’ o dog gag ang kanilang mga alaga para sigurado lang na hindi makakagat ng mga tao.

At ‘yung mga establishment naman na mayroong “no pet allowed” policy, be sure na naipatutupad  ninyo nang tama at wasto ang inyong patakaran.

Ganoon lang po kasimple.

Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap