Hey “Joe” Yasay! it sounds that ‘Yankee’ will be sent away today?!

MUKHANG sasayaw sa bubog si Secretary Perfecto Yasay sa pagdinig na gagawin ng makapangyarihang Commission on Appointments (CA) sa 22 Pebrero para sa pagtatalaga sa kanya bilang kalihim ng Department of Foreign Affairs (DFA).

Isa sa mga gustong maklaro ng isang komite sa CA na kinabibilangan ni Sen. Panfilo Lacson ang isyu tungkol sa citizenship ng Kalihim.

Ayon kay Senador Ping, mayroong request ang House contingent na gusto nilang marinig mismo sa bibig ni Secretary Yasay na, “Hindi na ako American citizen pero sa isang panahon ay naging American citizen ako.”

Naniniwala naman tayo sa kredebilidad ng mga kumukuwestiyon sa citizenship ni Secretary Yasay. At wala namang mawawala kung sasagutin niya nang totoo at pawang katotohanan ang mga tanong.

Hey Joe Yasay, the truth will set you free, so tell the truth!

‘Yun lang, hindi rin natin masisisi kung mayroon mang mga nagdududa sa sobrang ka-estriktohan ng CA sa kaso ni Secretary Yasay.

Bakit parang gigil na gigil ang ilang taga-CA na malaglag sa confirmation ang Kalihim ng Department of Foreign Affairs (DFA)?

Ngayon pa na malapit na ang buwan ng Mayo.

Ibig sabihin, isang taon na ang nakalilipas matapos ang nakaraang eleksiyon…

And maybe, it’s another payback time for President Rodrigo “Digong” Duterte?

Hindi ba’t noon pa man ay malakas na ang higing na gustong-gusto ng Pangulo na maitalaga sa DFA ang kanyang running mate na si Senator Alan Peter Cayetano?

Hindi kaya, ang hearing sa 22 Pebrero ay araw ng pamamaalam ni Secretary Yasay sa DFA?!

Mabigat ang basehan para tuluyang ibasura ng CA ang kompirmasyon kay Secretary Yasay lalo kung aamin siya o mapapatunayan na siya pala ay isang American citizen.

Napakasuwerteng tunay ni Senator Alan kapag nagkataon.

Ang tanong lang natin, gusto ba naman ni Senator Alan na maging DFA Secretary, gayong ang kanyang presidente ay masyadong ‘malikot’ mag-isip kung diplomatikong relasyon ng Filipinas sa ibang bansa ang pag-uusapan?!

Abangan natin ang mga susunod na kabanata, mga suki!

VIPs NG BILIBID SA ISAFP
CUSTODIAL CENTER
BUKING NA NAMAN
SA VIP TREATMENT ULIT?!

WALA na raw natira maliban sa isang telepono at isang telebisyon, at walang air-conditioning unit ang custodial center ng Intelligence Service of Armed Forces of the Philippines (ISAFP) nang masagawa ng clearing operations ang Bureau of Corrections (BuCor) at Special Action Force (SAF).

Sa custodial center ng ISAFP pansamantalang inilagak ang walong high-profile inmates ng National Bilibid Prison (NBP) na tumestigo laban kay Senator Leila De Lima sa congressional hearing tungkol sa illegal drugs trade sa loob.

Kasunod nito sinibak ni BuCor director Benjamin delos Santos ang halos 20 personnel habang nirerepaso ang kanilang kaso.

Nadidiin na naman ngayon si Justice Secretary Vitaliano Aguirre II matapos niyang sibakin si BuCor legal chief Alvin Lim, na siyang nagkuwestiyon at naglabas sa publliko na nanatili ang perks and privileges na paggamit ng electronic gadgets, smart television set, air-conditioning unit, internet at cellular phones ng walong high-profile inmates.

‘‘Yan daw ang kapalit ng patuloy na pagdiin ‘este pagtestigo nila laban kay Senator De Lima.

Tsk tsk tsk…

Mukhang walang humpay ang labanan sa pagitan ng magkakaibang kampo na nagsimula sa war on drugs ng kasalukuyang administrasyon.

Sa nangyayari ngayon, lalo lamang lumalabas na may katotohanan ang sinasabi ng Pangulo na malalim na ang inabot ng narco-politics sa sistemang pampolitika ng ating bansa.

At kung malalim na, mukhang hindi nga uubra rito ang mga tiradang tokhang at tokbang…

Kung ang narco-politics ay nagtatagumpay sa isang lipunang mas marami ang naghihirap at nagugutom ano ang pinakamabisang solusyon?

‘Yun ang dapat alamin at ugatin ng administrasyong Duterte.

Sabi nga niya, anim na taon lang siyang uupong Presidente ng bansa… At hindi niya dapat sayangin ang anim na taon.

Kailangan niyang umisip nang mas mabisang paraan upang tuluyang maigupo ang ilegal na droga sa bansa.

Kung sa tingin niya ay epektibo ang tokhang at tokbang, kailangang makaisip ang Pangulo ng kombinasyon nito para kusang mabakbak ang narco-politics sa sistemang panlipunan ng ating bansa.

Maraming magagaling na tao na nakapaligid sa Pangulo, sana’y makatulong sila sa pagsusulong ni Tatay Digs ng giyera kontra droga!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap