Sombero iniutos ni Gordon arestohin

IPAAARESTO ni Senate blue ribbon committee chairman, Sen. Richard Gordon, si dating C/Supt. Wally Sombero, kapag bumalik sa Filipinas.

Si Sombero ang itinuturong bagman at middleman ni Jack Lam, para suhulan ng P50 milyon ang ilang mga opisyal ng Bureau of Immigration (BI), para pakawalan ang hinuling 1,316 Chinese undocumented workers.

Ayon kay Gordon, nabigo ang kampo ni Sombero na makombinsi ang Senado, ukol sa rason nang patuloy na pagliban sa Senate hearings ng dating heneral.

Nais ni Gordon na ipakulong ang retired police general sa Muntinlupa City, hanggang makipagtulungan sa nag-iimbestigang lupon.

Katuwiran ni Atty. Ted Contacto, abogado ni Sombero, nasa labas ng bansa ang kanyang kliyente, at sumasailalim sa medical attention.

(CYNTHIA MARTIN)