HATAW! D'yaryo ng Bayan hatawtabloid.com
PATAY ang isang softdrink dealer, habang sugatan ang kanyang driver, at ang garbage collector, makaraan pagbabarilin ng hindi nakilalang riding-in-tandem sa Caloocan City, kamakalawa ng gabi.
Agad binawian ng buhay si Alvin Delpin, 46, ng 683 Franvill-II Subd., Area A, Brgy. 175, Camarin, ng lungsod.
Habang nilalapatan ng lunas sa Dr. Jose Rodriguez Hospital si Lemen Grana, 56, residente ng Franvill-II Subd., at ang garbage collector na si Mark Gil Bigasbis, 31, ng Doña Ana, Brgy. 175, Camarin
Patuloy ang follow-up investigation ng pulisya upang matukoy ang pagkakilanlan ng mga suspek at ang motibo sa pamamaril.
Ayon sa ulat ng pulisya, dakong 9:30 pm, lulan ang biktima ng motorsiklo na minamaneho ni Grana, habang binabagtas ang Old Tenant St., Area A, Brgy. 175, Camarin nang biglang sumulpot ang isang motorsiklo at pinagbabaril ang biktima.
Tinamaan din sa insidente si Grana, at ang garbage collector, naroroon sa lugar nang mangyari ang insidente.
Sa pahayag sa pulisya ni Grana, galing sila ni Delpin sa Sta. Monica Cockpit Arena sa Novaliches, Quezon City, makaraan manalo ang biktima ng P500,000 sa sabong.
Hindi nabanggit sa imbestigasyon kung nakuha ng mga suspek ang nasabing halaga.
(ROMMEL SALES)
