Kamot ulo si Joma

KUNG inaakala ng mga rebeldeng komunista na matatakot nila si Pangulong Rodrigo “Digong” Duterte, nagkakamali sila. Sa halip kasing yumukod sa mga kapritso ni Jose Maria Sison, pinuno ng Communist Party of the Philippines (CPP), ginulantang na lamang sila nang magdesisyon si Duterte na itigil na ang peace talks.

Nitong nakaraang Pebrero 1, buong yabang na idineklara ng NPA na ibinabasura na nila ang unilateral ceasefire na kanilang idineklara sa dahilang maraming paglabag umano ang Armed Forces of the Philippines kabilang ang hindi pagpapalaya sa mga political prisoners na umaabot sa 400 ang bilang.

Pero sa halip na pasindak si Duterte sa mga pananakot ng NPA, tinugon kaagad ito ng pangulo sa pagbasura ng sariling ceasefire ng pamahalaan, at ang nakagugulat ay sinundan kaagad nang panawagang itigil na mismo ang usapang pangkapayapaan.

Kamot ulo si Joma!

Hindi niya inaakala na buong tapang silang sasagutin ni Duterte. Hindi na naisip ni Joma na hindi maaaring pagbigyan ang kanilang kahilingan na palayain ang mga political prisoners dahil may mga kasong criminal na kinakaharap sa korte.

Sa simula pa lang, hindi na dapat pinatulan ni Duterte itong si Joma. Naghihingalong organisasyon ang CPP at matagal nang bangkarote ang kanilang ideolohiya. Pawang mga lolo na ang mga negosyador ng mga komunista, kulang na lang maglagay ng diaper itong si Joma at itong si Luis Jalandoni.