Miss Universe 2016 coronation bukas na sa MOA Arena

DAHIL ang ating bansang Filipinas ang host sa Miss Universe 2016, at magpapasa ng korona ang nagwaging si Miss Universe 2015 Pia Wurtzbach na isa ring Filipina, marami ang nanalangin at umaasa na sana’y ‘manatili’ ang korona bilang karangalan ng ating bansa.

Ibig sabihin, sana raw ay magwagi si Miss Philippines Maxine Medina.

Bagama’t noong mga unang linggo ay madalas na napupuna si Miss Maxine dahil sa kanyang paggamit ng wikang English, aba, parang biglang tumahimik ang publiko nang rumampa na ang mga kandidatang Miss Universe mula iba’t ibang bansa nitong nakaraang gabi, at lumutang ang kagandahan, alindog at kaseksihan ni Miss Maxine sa iba pang kandidata.

Hopefully, biyayaan nang mas mataas na confidence, alertness, smartness at wittiness sa question and answer portion si Miss Medina para magkaroon tayo ng malaking tsansa na masungkit ulit ang korona.

Ang huling balita, magha-hire na raw ng interpreter si Miss Maxine. Okey, pero siyempre, kailangan pa rin na maging articulate, smart at witty ang kanyang magiging sagot sa mga tanong.

Sa panig ng organizer na LCS (Luisito Chavit Singson) Group of Companies, na siyang gumastos nang malaki para maisakatuparan ang pagho-host na ito ng Filipinas, nauna nang nagdeklara ang businessman-politician na si Chavit Singson, hindi bale nang hindi siya kumita nang gaano o mabawi ang kanyang puhunan, ang importante mai-promote niya ang kanyang kompanya at ang ating bansa.

Bukas na po gaganapin, Lunes, 30 Enero, sa Mall of Asia Arena, Pasay City ang coronation. Mag-uumpisa umano ang programa mula 8:00-11:00 am dahil gabi ito mapapanood sa ibang bansa.

Kaya asahan na po ninyo ang grabeng traffic sa nasabing area. Tiniyak na rin ng PNP na kasado na ang seguridad sa nasabing event kaya pakiusap na rin sa ibang motorista at pedestrians na patungo sa nasabing area, sumunod sa itatakdang alituntunin para hindi makadagdag sa pagsisikip ng trapiko.

By the way, ito nga po pala ang ikalawang Miss Universe sa kasayayan, lampas sa kanyang buong taon gaya noong 2014 pageant na ginanap Enero 2015.

Sa lahat ng mga nagsikap para mai-host nang maayos sa Filipinas ang Miss Universe 2016, salamat sa inyo at mabuhay!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap