HATAW! D'yaryo ng Bayan hatawtabloid.com
PUMITAS ng players sa bench si Perpetual Help coach Sammy Acaylar upang pagpagin ang Lyceum of the Philippines, 25-21, 29-27, 25-23 sa women’s division ng 92nd NCAA volleyball tournament sa Filoil Flying V Center sa San Juan City.
Malamya sa kaagahan ng laro sina team captain Cindy Imbo at Ma. Lourdes Clemente kaya napilitang dukutin ni Acaylar sa bench sina Jamela Suyat, Coleen Bravo at Jowie Albert Versoza, maganda ang naging resulta at nanatiling buhay ang asam ng Lady Altas na makapasok sa Final Four.
Bumira sina Suyat, Bravo at Versoza ng 19, 13 at 11 points ayon sa pagkakahilera upang itarak ang 4-3 card ng Perpetual.
Bumakas din ang reserve na si Maria Aurora Tripoli ng siyam na puntos para sa Perpetual na kailangan pang ipanalo ang dalawang natitirang laro para sumampa sa semifinals.
“I have faith in all my players that they will deliver if given a chance,” saad ni Perpetual Help coach Sammy Acaylar.
Sunod na makakalaban ng Las Piñas-based school ang Jose Rizal sa Enero 18 at Arellano U (Jan. 25.).
“We know in our hearts that we’re still in it, we just have to believe,” ani Acaylar.
Natikman ng Lady Pirates ang pangalawang talo sa pitong laro.
(ARABELA PRINCESS DAWA)
