DALAWA ang kompirmadong patay, kabilang ang isang jail officer, makaraan magkaroon ng putukan sa loob ng isang selda sa Camiling, Tarlac na humantong sa hostage-taking nitong Linggo.
Sinabi ni Chief Supt. Aaron Aquino, hepe ng Central Luzon Police, dakong 10:20 am nang mang-agaw ng baril ang presong kinilalang si Rolly Falcon at pinaputukan ang hindi pa pinangalanang babaeng jail officer na agad binawian ng buhay.
Nauwi sa enkwentro ang pamamaril ni Falcon kaya’t napatay ang suspek ng nagrespondeng mga pulis.
Sugatan sa insidente ang dalawa jail officer at isang preso.
Makaraan nito, tumakas ang dalawang preso na kinilalang sina Drackilou Falcon at Marlon Altizu.
Ayon kay Aquino, nang habulin ng mga pulis si Altizu ay nang-hostage ang preso ng isang 6-anyos bata sa kalapit na lugar.
Ngunit makaraan ang ilang oras na negosasyon, sumuko ang suspek at ligtas na napakawalan ang bata pasado 4:00 pm habang balik-selda ang nasabing preso.
Nagsasagawa ng follow-up operation ng Tarlac police upang maaresto ang isa pang nakatakas na preso.
Nagpapatuloy ang imbestigasyon ng pulis-ya sa nasabing insidente.
