HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
NAGHAIN si Bea Alonzo ng tatlong magkakahiwalay na criminal case at cyber libel laban kina Ogie Diaz at Cristy Fermin.
Kasama ni Bea sa paghahain ng kaso ang abogadong si Atty. Joey Garcia at ang kanyang manager na si Shirley Kuan.
Ayon sa Facebook post na ibinahagi ni Nelson Canlas ng GMA, dumulog ang aktres sa Quezon City Prosecutors Office para maghain ng tatlong magkakahiwalay na criminal case at cyber libel case laban kina Tita Cristy at Ogie kasama ang mga co-host nila sa kani-kanilang online showbiz programs.
Base sa complaint affidavit ng Kapuso actress, naging biktima siya ng mali, malisyoso, at mapanirang impormasyon na galing sa nagpapanggap na malapit sa kanya na siyang pinag-usapan sa mga show ng veteran columnist at online host na sina Tita Cristy at Ogie na wala naman daw basehan.
Kasama na rito ang umano’y paninira kay Bea sa kanilang mga show kabilang na ang umano’y ‘di pagbabayad ng tax.
Kasama rin sa sinampahan ng kaso ang isang netizen na nagpapanggap na malapit sa aktres.
Wala pang inilalabas na pahayag sina Tita Cristy at Ogie sa isyung ito.
Bukas ang Hataw para sa pahayag nina Bea, Cristy, at Ogie ukol sa kasong kinakaharap.
