HATAW! D'yaryo ng Bayan hatawtabloid.com
LEGAZPI CITY- Masusing iniimbestigahan ng mga awtoridad ang pamamaril sa isang miyembro ng Concepcion gun for hire group sa Libon, lalawigan ng Albay kamakalawa.
Ito ay isang araw makaraan iutos ni Bicol Police Regional Director Chief Supt. Melvin Buenafe ang paghahanap at pagdakip sa miyembro ng notorious na Concepcion group.
Pinagbabaril ng dalawang armadong lalaki ang kasalukuyang nanunungkulan bilang barangay kagawad ng Bonbon na si Gilbert Misambique, 46-anyos.
Ayon sa Libon Municipal Police Station, nasa drug watchlist nila ang biktima at aktibong gumagamit at tulak ng shabu.
Agad itinakbo sa Bicol Regional Teaching and Training Hospital (BRTH) sa lungsod ng Legazpi ang biktima.
Sa ngayon, hindi pa malaman ang pagkakakilanlan ng dalawang suspek sa nasabing pamamaril, habang nananatiling naka-full alert ang pulisya kaugnay sa panggugulo ng Concepcion group.
