Senate probe sa pagkamatay ni Mayor Espinosa itutuloy sa Camp Crame

SA pagpapatuloy ng imbestigasyon sa pagkamatay ni Albuera Mayor Rolando Espinosa Sr., nais ni Senator Panfilo “Ping” Lacson na ituloy ang pagdinig sa Camp Crame, bukas, araw Miyerkoles.

Isa marahil sa ikinokonsidera rito ni Senator Lacson, ang kaligtasan ng nakababatang Espinosa (Rolando “Kerwin” Espinosa Jr.) na ngayon nga ay nasa bansa na at doon nakadetine sa Camp Crame.

Sa ‘bigat at laki’ nga naman ng impormasyog hawak ngayon ni Kerwin, na pinaniniwalaang makatutulong nang malaki sa maigting na kampanya kontra ilegal na droga ni Pangulong Rodrigo “Digong” Duterte, tiyak na marami ang nagtatangkang siya naman ang maitumba gaya ng kanyang ama.

Kung hindi tayo nagkakamali, nauna nang nagkaharap sina Senator Manny Pacquiao at Kerwin with consent mula kay Sen. Ping.

At sabi nga ng boksingerong senador, maraming pangalan ang ibinunyag ni Kerwin na nakikinabang sa kanya.

Naisiwalat din kaya kay Sen. Manny ni Kerwin kung sino-sino ang mga politikong nanghingi o binigyan niya ng campaign funds nitong nakaraang eleksiyon?!

Tama ang sinabi ni Sen. Ping, importanteng resource person si Kerwin sa laban ng gobyerno sa ilegal na droga.

Si Kerwin din ang magkokompirma sa inilabas na ‘blue book’ at payola ng kanyang tatay na si Mayor Espinosa.

Ang tanong natin dito, si Kerwin na nga kaya ang kasagutan para tuluyan nang magwakas ang operasyon ng mga sindikato sa ilegal na droga sa ating bansa?!

Mga suki, abangan natin at bantayan ang mga susunod na malalaking pangyayari sa ating bansa.

ERAP SERIOUS NA BA…
SA PAGLILINIS NG MAYNILA?!

Isang traffic super body daw ang nilikha ni Erap, ayon sa isang praise ‘este press release na ipinadala sa atin ng Manila city hall.

Ito ‘yung super body na ang komposisyon ay mula sa Department of Public Safety (DPS), Manila Police District-Traffic Enforcement Unit (MPD-TEU), Manila Tricycle Regulatory Office, Office of the City Engineer, Manila Barangay Bureau, City Treasurer’s Office, and the Manila City Hall Action and Support Assignment (MASA), local transport groups, truckers associations, Parents-Teachers Associations (PTAs), city councilors, at barangay officials.

Kasama rin daw ang port operators na International Container Terminal Services (ICTSI) at Asian Terminals, Inc. (ATI) upang lutasin ang masikip na trapiko sa Maynila.

Aba, parang bigtime pasiklab itong praise ‘este press release na ito ni ‘Diego’ ng Maynila.

Puwede naman sana natin itong paniwalaan, kung malinis ang paligid ng Manila city hall.

E kaso nga hindi…

Kung uunahing linisin ng traffic super body ang illegal terminal sa Plaza Lawton, at diyan sa gilid ng city hall ‘e baka maniwala tayo na kaya nga nilang linisin ang Maynila.

Pati na ang nagkalat na snatcher/holdaper diyan sa A.O.R. ng PCP Lawton!

Umpisahan muna ninyong linisin ang malapit sa teritoryo ninyo para maniwala ang mga Manileño na seryoso at kaya na ninyong linisin ang Maynila!

Tapos ang usapan!!!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap