Sindikato ng ‘squatters’ sa Quezon City protektado ng City Legal Department? (Atty. Felipe Arevalo III may dapat ipaliwanag…)

GUSTO natin manawagan kay Mayor Herbert “Bistek” Bautista dahil sa talamak at hindi namamatay na isyu ng syndicated squatting sa Quezon City.

Hindi po natin dito pinag-uusapan ang mga squatter na kaya nag-i-squat ay dahil walang trabaho at walang kakayahang umupa kahit sa maliit na entresuelo.

Ang tinutukoy po ng ating impormante at nagrereklamong biktima, na higit kalahating siglo nang naninirahan sa inaagaw sa kanilang lote ay ‘yung makuwartang ‘sindikato’ na tila kasabwat pa ang city legal department.

Ang kanilang tahimik na paninirahan ay binulabog umano ng isang Atty. Felipe Arevalo III.

Sumulat daw kasi ‘yang si Arevalo sa mga tinutukoy niyang ‘squatters’ na maaaring mapasakanila ang 13 private lots kung kaya nilang pondohan.

Take note lang po, ang tinutukoy na squatters ni Arevalo ay may kakayahang magpondo ng P7.5 milyones para mapakasanila ang 13 private lots.

Wattafak!

Ano ‘yan, ‘milyonaryong’ squatters?

Nagtataka ang mga matagal nang naninirahan sa nasabing 13 private lots kung bakit naideklara nitong si Arevalo ang kanilang lote na puwedeng pondohan at angkinin ng mga ‘milyonaryong’ squatters.

Suspetsa ng mga naninirahan sa nasabing lote, mukhang ginagatasan ng kung sinong city hall official ang milyonaryong squatters.

Matagal na palang dismissed sa korte ang pagnanasa ng mga nasabing milyonaryong squatters pero hanggang ngayon ay naghahabol pa rin sila.

Pero ang nakadedesmaya talaga ‘e ‘yung mayroon silang kasapakat mula sa city legal department.

Magkano ‘este ano ang dahilan at bakit iginigiit ni Arevalo na ang nasabing 13 private lots ay dapat ‘pondohan’ ng city government sa pamamagitan ng ordinansa para tuluyang mapasakamay ng mga ‘milyonaryong  squatters’ na kayang-kaya rin magpondo ng P7.5 milyones?!

Atty. Arevalo, mabigat na akusasyon ito?

Ano ang katotohanan sa mga hinaing na ito ng mga naninirahan diyan sa tinutukoy na lote?!

Please explain!

Mayor Bistek Bautista, alam mo ba ang nangyayaring ito?!

Pakibusisi lang Mayor!

SA SHABU NABUHAY
SA SELDA NATODAS?

Parang pelikula raw ang naging buhay ni Mayor Rolando Espinosa ng Albuera, Leyte.

Mula nang ibunyag ni Pangulong Rodrigo “Digong” Duterte, ang pagkakasangkot sa shabu ng mag-amang Kerwin at Rolando, nakita ng publiko kung paano mamuhay ang kanilang pamilya.

Mantakin ninyo, mayroon sila 5,000 square meters na bahay. Ang 5,000 sqm ay kalahating ektaryang lupain, dear readers.

Ibig sabihin, sa loob ng kanilang bahay ay kinakailangan nilang gumamit ng sasakyan para makalipat kung nasaan ang kanilang kusina, sala, kuwarto at iba pang bahagi ng kanilang bahay.

Siyempre pa, may elevator din.

‘Yan ang tinatawag na ‘detalyadong’ pamumuhay.

Ganyan kasagana ang kanilang buhay, kapalit ng winasak na mga buhay, dahil sa pagkalulong sa shabu.

Kahit marami ang galit dahil sa isyu ng droga, marami pa rin ang nagulat nang pumutok ang balita na napatay sa loob ng selda si Espinosa.

Kung sabagay, mas gugustuhin ng mga ganid na drug lords ang ganyang kamatayan, kaysa naman singilin sila ng panahon at ubusin ang kanilang kinitang salapi sa droga dahil sa pambihira at matagalang sakit.

Malamang na gumiling na naman ang mga camera para sa imbestigasyon kung paano namatay si Mayor Espinosa sa loob ng selda…

Pansamantala, idinadalangin natin na sana’y patawarin siya ng Makapangyarihang Diyos at bigyan ng pagkakataon na makapagtika sa purgatoryo kasama ang mga kaluluwang naibulid nila sa masamang bisyo.

Harinawa.

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap