HATAW! D'yaryo ng Bayan hatawtabloid.com
PATAY ang isang hinihinalang drug pusher na nagtangkang hagisan ng granada ang mga operatiba ng Quezon City Police District (QCPD) makaraang barilin ng mga pulis habang naaresto ang isang babaeng drug den maintainer sa operasyon ng mga awtoridad sa Brgy. Holy Spirit ng lungsod, iniulat ng pulisya kahapon.
Sa ulat kay QCPD District Director, Sr. Supt. Guillermo Lorenzo T. Eleazar, kinilala ang napatay na si Henry Cortes, 52, residente ng 21 Don Carlos St., Brgy. Holy Spirit, Quezon City, sumuko na noong Setyembre 13, 2016 sa Batasan Police Station 6 sa pagpapatupad ng Oplan Tokhang, ngunit ipinagpatuloy ang kanyang ilegal na aktibidades.
Habang ang arestadong drug maintainer ay kinilalang si Marites Romero, 54 , residednte ng Gravel Pit Rd., San Jose Del Monte, Bulacan. Nadakip din ang tatlo pang mga suspek na sina Ambrocio Corpin, 38; Joseph Sacsilla, 34, at Jackelyn Dela Cruz, 29-anyos,
Nauna rito, dakong 1:40 pm kamakalawa, nakatanggap ng tawag ang PS-6 na may pot session sa drug den na pinatatakbo ni Romero sa squatters area sa Don Carlos St., Don Antonio Heights Subd., Brgy. Holy Spirit.
Agad nagresponde ang mga pulis at pagdating sa lugar ay tinangka silang hagisan ng granada ni Cortes kaya pinaputukan ng mga awtoridad na nagresulta sa kanyang pagkamatay. Habang naaresto si Romero at tatlo pang mga suspek.
( ALMAR DANGUILAN )
