HATAW! D'yaryo ng Bayan hatawtabloid.com
BINAWIAN ng buhay ang isang 7-anyos batang babae makaraan gahasain at paluin ng matigas na bagay sa ulo o iniuntog sa semento sa loob ng sementeryo sa Malabon City kamakalawa ng gabi.
Kinilala ni Malabon Police chief, Senior Supt. John Chua ang biktimang si Maria Nelia Ramos, residente sa Acero St., Brgy. Tugatog ng nasabing lungsod.
Habang naaresto ang suspek na si Jay-R Payawal, 30, ninong at kapitbahay ng biktima, positibong itinuro ng testigo na huling kasama ng biktima bago natagpuang patay.
Sa imbestigasyon nina SPO1 Rolando Hernando, PO2 Benjamin Sy Jr., at PO2 Maria Teresa Dagman, dakong 9:30 pm nang matagpuan ni PO1 Donald Lopez ng PCP-4, sa loob ng Tugatog Cemetery sa Dr. Lascano Street ang biktimang walang saplot na pang-ibaba, basag ang bungo at wala nang buhay.
Ayon sa ulat, may mga palatandaan na hinalay muna ang biktima bago pinatay.
Sa pahayag sa pulisya ng 16-anyos testigong si Mark, nakita niya ang suspek na akay-akay ang bata papasok sa sementeryo dakong hapon kaya agad niyang isinumbong sa mga barangay tanod ngunit nadatnang wala nang buhay ang biktima.
Tumanggi sa akusasyon ang suspek na napag-alamang adik sa droga at kabilang sa drug watchlist ng Barangay Anti-Drug Abuse Council (BADAC).
( ROMMEL SALES )
