‘Mangkukulam’ itinumba sa ComVal

DAVAO CITY – Patay ang isang 72-anyos lola nang pagbabarilin makaraan akusahan na isang mangkukulam sa Purok 5, Matilo, Nabunturan, Compostella Valley Province kamakalawa.

Hustisya ang sigaw ng pamilya ng biktimang si Pilagia Curimatmat, 72, biyuda, binaril ng hindi nakilalang suspek.

Ayon sa anak ng biktima na si Sherly Curimatmat Sanchez, nabigla siya nang makarinig nang sunod-sunod na putok ng baril sa likod ng kanilang bahay.

Sinasabing bago nangyari ang krimen, may nakausap ang kanyang ina ngunit hindi nakita ang mukha dahil madilim ang paligid.

Napag-alaman mula kay Sherly, inakusahan ang kanyang ina na mangkukulam na kanyang mariing itinanggi.