5 patay sa sagupaan ng 2 pamilya sa Basilan

ZAMBOANGA CITY – Limang kalalakihan ang namatay sa enkwentro nang magkaaway na pamilya sa Sitio Langaray, Brgy. Manaul, Sumisip lalawigan ng Basilan kahapon ng umaga.

Ayon sa ulat ng PNP, dakong 7:40 am nang magkasagupa ang magkalabang angkan ng Abdulmuin at Alih.

Dalawa sa mga namatay ay mula sa angkan ng Abdulmuin na kinilalang sina Illang Manisan at Serny Julti.

Habang tatlo sa mga namatay ay mula sa pamilya Alih na kinilalang sina Immah Abubakar, Antotong Ismael at Kasim Talhata.

Ang mga namatay ang pawang mga residente ng nasabing barangay at lahat ay “dead on the spot” dahil sa mga grabeng tama ng bala mula sa M6 armalite rifle.

Kinuha na ng kani-kanilang pamilya ang mga namatay nilang kaanak para mailibing sa tradisyon ng Islam.

Habang nakaalerto ang mga awtoridad sa lugar upang maiwasang maipit ang mga inosenteng sibilyan kung sakaling muling magkasagupa ang magkakalabang angkan.

Ang “rido” ng mga armadong pamilya ay isa sa mga sanhi ng madudugong sagupaan sa lalawigan ng Basilan.