HATAW! D'yaryo ng Bayan hatawtabloid.com
NAARESTO ng mga operatiba ng Quezon City Police District (QCPD) ang dating bold star noong dekada 90 na si Sabrina M sa isinagawang buy-bust operation sa Brgy. Pasong Tamo ng nasabing lungsod kamakalawa ng gabi.
Sa pulong balitaan sa QCPD Headquarters sa Kampo Karingal, iniharap ni QCPD director, Sr. Supt. Guillermo Lorenzo T. Eleazar, sa mga mamamahayag ang dating artistang si Karen Salas Palasigui (tunay na pangalan) at may screen name na Sabrina M, 36, at residente ng 9 Pulangui St., Napocor Village, Brgy. Pasong Tamo, Quezon City.
Naaresto rin ang dalawang kasama ni Sabrina M na sina Erwin Locsin Martin, 29, ng 9 Pulangui St., at Edwin Locsin Coloma, 38, ng Roque 1 Extention, Brgy. Pasong Tamo.
Nauna rito, nakatanggap ng impormasyon ang QCPD District Anti-Illegal Drugs (DAID) hinggil sa ilegal na aktibidad ni Sambrina M.
Isang asset ang pinakilos para magmanman kay Sabrina M at nakuhaan ng video ang dating bold star habang bumabatak ng shabu.
Bunga nito, ikinasa agad ng DAID at District Special Operation Unit (DSOU) na pinamumunuan ni Supt. Rogarth Campo, ang buy-bust operation laban kay Sabrina M.
Dakong 11:45 pm inaresto ang babaeng nasa likod ng pelikulang ”Masarap ang Unang Kagat,” makaraan bentahan ng shabu ang pulis na nagpanggap na buyer.
Nakuha kay Sabrina M ang P6,000 marked money at limang gramo ng shabu.
Kaugnay nito, sinabi ni Eleazar, malaki ang posibilidad na may mga artistang kustomer si Sabrina M dahil ito ang dati niyang “circle of life.”
( ALMAR DANGUILAN )
